मासळी बाजाराच्या जागेचा तिढा कायम; न्यायालयाच्या आदेशानंतरही मासळी विक्रेत्यांचा जागेवर ताबा

नोझर इराणी यांचे नातेवाईक परवीन नोझर इराणी यांनी डहाणू मासळी बाजार भरत असलेली जागा आपल्या मालकीची असल्याचा तसेच ती रिकामी करण्यासाठी सर्वोच्च न्यायालयाकडून आदेश मिळवला आहे. त्यानुसार कोर्टाने नगर परिषदेला जागा खाली करण्याचे आदेश दिले असून त्याची अंमलबजावणी करण्यासाठी सोमवारी पोलीस बंदोबस्तात मासळी बाजार खाली करण्याचा प्रयत्न केला. कोर्टाच्या आदेशात हस्तक्षेप न करता मासळी विक्रेत्या महिलांनी ही प्रक्रिया पूर्ण करू दिली. मात्र दुसऱ्या दिवशी पुन्हा या विक्रेत्या महिलांनी जागेत घुसून मासळी बाजाराच्या बसण्याच्या जागेवर जाऊन ताबा घेतल्याचे वकील मुकेश पागधरे यांनी सांगितले. याबाबत जागा मालक इराणी यांच्याशी संपर्क करण्याचा प्रयत्न केला, मात्र संपर्क झाला नसल्याने त्यांची बाजू कळू शकली नाही.

संघर्ष कशासाठी?

डहाणू शहरात इराणी रोड येथे नोझर इराणी या मूळ मालकांच्या जागेत पूर्वापार  १५० हून अधिक मासळी विक्रेते बसतात. मात्र सध्या ही जागा रिकामी करण्यासाठी मालक आणि मासळी विक्रेते यांच्यात संघर्ष सुरू होता. सोमवारी ही जागा मालकाने ताब्यात घेतली. ४ एप्रिल २०१२ रोजी डहाणू नगर परिषदेच्या मंजूर विकास आराखडय़ात सदरचा भूखंड मासळी बाजारासाठी आरक्षित भूखंड आहे. त्यामुळे नगर परिषदेने जागामालकास मोबदला देऊन मासळी बाजाराची ही जागा कायदेशीर करावी, अशी मागणी विक्रेत्यांनी केली आहे. २०१२च्या आराखडय़ात नगर परिषद क्षेत्रात एकूण १५३ आरक्षणे आहेत, त्यात सध्याची वादग्रस्त मासळी बाजाराची जागा एमटू फिश मार्केट म्हणून राखीव आहे. त्यामुळे ही जागा मिळण्यासाठी संघर्ष सुरू आहे.

आरक्षण असलेली जागा सदर मासळी बाजारासाठी खरेदी करण्यासाठी शासनाची परवानगी मागितली आहे. शासनाने त्यास परवानगी दिल्यास जागामालकास जमिनीचा मोबदला देऊन जागा उपलब्ध करून दिली जाऊ शकेल.

– वैभव आवारे, मुख्याधिकारी, डहाणू