मोबाइल नसल्याने आभासी शिक्षण कागदावरच

टाळेबंदीमुळे विद्यार्थ्यांच्या शाळा लांबल्या आहेत. अनेक शाळांनी ऑनलाइन शिक्षण सुरू केले आहेत. परंतु पालघर जिल्ह्यातील अनेक आदिवासी कुटुंबाकडे ना उच्चक्षमतेचे मोबाइल व दूरचित्रसंच. अनेक भागांत नेटवर्कही नाही अशी परिस्थिती आहे त्यामुळे ग्रामीण भागात ऑनलाइन शिक्षणाचा गोंधळ आहे. मनोर- जव्हार राज्यमार्ग, डहाणू-नाशिक राज्यमार्ग, टेण -वाडा राज्यमार्ग, विक्रमगड- जव्हार महामार्ग,  कोसबाड, भोपोली तसेच ठिकठिकाणी रस्त्याच्या कडेला बसून विक्री करत असलेल्या लहान मुलांच्या रानभाज्यांच्या टोपऱ्या खवय्यांना खुणावत असतात. पळसाच्या पानात कोळी भाजी, करडू, बांबू भाजी, शीन, करटोळीचे वाटे मांडून विक्री करतात. हे विद्यार्थी पावसाळ्यातच उगवणाऱ्या या भाज्यांची विक्री करताना दिसतात. शाळा बंद असल्याने अनेक विद्यार्थ्यांनी शेतीच्या कामात पुढाकार घेऊन शेतीचे धडे गिरवले. अनेकांनी नांगर चालवण्यापासून शेतीमध्ये बांध घालणे, चर खोदणे, भार खणणे, आवणे आदी कामात झोकून दिले आहे.