पुणे शहरात आज दिवसभरात नव्याने १६२१ नवे करोना रुग्ण आढळले आहेत. १ लाख ३८ हजार ९५१ एवढी रुग्ण संख्या झाली आहे. तर आज दिवसभरात ४१ रुग्णांचा मृत्यू झाला आहे. त्यामुळे आज अखेर ३ हजार २९६ रुग्णांचा मृत्यू झाला आहे. करोनावर उपचार घेणार्‍या १२५६ रुग्णांची तब्येत ठणठणीत असल्याने, त्या सर्वांना घरी सोडण्यात आले आहे. त्यामुळे आज अखेर १ लाख १७ हजार ८८२ रुग्ण करोना मुक्त झाले असल्याची माहिती पुणे महापालिकेच्या आरोग्य विभागा मार्फत देण्यात आली आहे. पिंपरी-चिंचवड शहरात आज दिवसभरात ८५६ करोना बाधित रुग्णांची नोंद झाली असून ४९ जणांचा उपचारादरम्यान मृत्यू झाला आहे. तर १ हजार ३१८ जण आज करोनातून मुक्त झाले असून त्यांना घरी सोडण्यात आले आहे. पिंपरी-चिंचवड शहरातील एकूण बाधित रुग्णांची संख्या ७४ हजार ११६ वर पोहचली असून पैकी, ६० हजार ७६४ जण करोनातून बरे झाले आहेत. पिंपरी-चिंचवड महानगर पालिकेच्या रुग्णालयात उपचार घेणाऱ्या सक्रिय रुग्णांची संख्या ४ हजार ८९२ एवढी आहे अशी माहिती महानगर पालिकेच्या आरोग्य विभागाने दिली आहे.
