पुण्यातील कोंढवा परिसरात राहणारी सात वर्षांची चिमुकली आपल्या आईसोबत दुचाकीवरून मामाला भेटण्यासाठी जात असताना. पुणे स्टेशनजवळ असलेल्या आरटीओ ऑफिससमोर टँकरने त्यांच्या दुचाकीला जोरात धडक दिल्याने घडलेल्या अपघातामध्ये त्या चिमुकलीचा जागीच मृत्यू झाल्याची हृदयद्रावक घटना घडली आहे. श्री दत्तात्रय थोरात (वय -७) असे अपघातामध्ये मृत्यू झालेल्या चिमुकलीचे नाव आहे. मनीषा दत्तात्रय थोरात (वय ३८) रा. कोंढवा असे आईचे नाव आहे. आरोपी टँकर चालक राम बाबू खाडे यास अटक करण्यात आली आहे. पोलिसानी दिलेल्या माहितीनुसार, कोंढवा परिसरातील शिवनेरी नगर येथे मनीषा दत्तात्रय थोरात या पती आणि मुलांसोबत राहतात. तर मनीषा या भावाला भेटण्यासाठी मोपेडवरून दुपारच्या सुमारास चाकणकडे जाण्यास निघाल्या होत्या. त्यावेळी त्यांच्या सोबत सात वर्षाची श्री ही चिमुकली ही देखील होती. मनीषा यांची दुचाकी पुणे स्टेशन जवळ असलेल्या आरटीओ ऑफिस समोरील पेट्रोल पंपापासून संगमवाडीकडे जात होती. तेवढय़ात पाठी मागून त्यांच्या गाडीला टँकरने जोरात धडक दिली. त्यामध्ये मनीषा यांच्या पायाला गंभीर दुखापत झाली. तर सात वर्षाच्या श्रीचा जागीच मृत्यू झाला. या प्रकरणी टँकर चालक राम बाबू खाडे याला अटक करण्यात आली असून, अधिक तपास करण्यात येत असल्याचे बंडगार्डन पोलिसकडून सांगण्यात आले.
