पुणे बार असोसिएशनचे माजी अध्यक्ष लक्ष्मण घाडगे-पाटील यांच्याविरुद्ध सर्वोच्च न्यायालयाच्या आदेशानुसार आरोप निश्चित करण्यात आले. त्यांच्यावर कट रचणे, खून करणे, पुरावा नष्ट करणे या कलमांखाली आरोप ठेवण्यात आले आहेत. अतिरिक्त सत्र न्यायाधीश एस. टी. ढवळे यांच्यासमोर या खटल्याची सुनावणी सुरू आहे. पाटील यांच्या अल्पवयीन मुलीसोबत असलेल्या प्रेमप्रकरणातून इंद्रजित वर्मा (वय १८) या तरूणाचा २ जुलै २००७ रोजी खून झाला होता. याप्रकरणी घाडगे पाटील यांच्यासह सात जणांस पोलिसांनी अटक केली होती. त्यानंतर या खटल्यातून घाडगे पाटलांना सत्र न्यायालयाने वगळले होते. या निर्णयाच्या विरोधात इंद्रजितची आई अनुराधा वर्मा यांनी उच्च न्यायालयात धाव घेतली. उच्च न्यायालयाने सत्र न्यायालयाचा निर्णय रद्द ठरवत घाडगेपाटलांना या खटल्यात सहआरोपी करण्याचे आदेश दिले होते. या निर्णयाच्या विरोधात पाटील यांनी सर्वोच्च न्यायालयात अपील केले. सर्वोच्च न्यायालयाने पाटील यांचे अपील फेटाळून लावले. त्यानुसार त्यांच्याविरुद्ध सत्र न्यायालयात आज आरोप निश्चित करण्यात आले. या खटल्यांमध्ये सहा महिन्यांपूर्वी इतर सहा आरोपींच्या विरुद्ध आरोपनिश्चित करण्यात आले आहेत. या खटल्यात अतिरिक्त सरकारी वकील चंद्रकिरण साळवी हे काम पाहात आहेत.