पुणे आणि पिंपरी शहरात व्हॉटसअॅप ग्रूपच्या माध्यमातून मोठ्या प्रमाणावर वेश्या व्यवसाय सुरू असल्याची धक्कादायक बाब उघडकीस आली आहे. हिंजवडी परिसरातून या रॅकेटची सूत्रे हलवली जात होती. अनेक उच्चशिक्षित तरूण-तरूणी या रॅकेटमध्ये सहभागी असल्याचे समजते. त्यामुळे पुणे पोलिसांसमोर मोठे आव्हान निर्माण झाले आहे. सूत्रांकडून मिळालेल्या माहितीनुसार, हिंजवडी परिसरात उच्चशिक्षित तरुण या रॅकेटमध्ये सक्रिय असल्याचे समोर आले असून, संकेतस्थळावरील मोबाईल नंबरच्या माध्यमातून देह व्यापाराचा धंदा नियोजित पद्धतीने सुरु होता. त्यानंतर व्हॉटसअॅपच्या माध्यमातून तरूणी ग्राहकांशी संपर्क साधत. देहविक्रीसाठी ५ हजारपासून ते ४० हजार रूपयांचे दर निश्चित करण्यात आले होते. संबंधित तरुणी मोबाईलच्या माध्यमातून काम करत असल्यामुळे त्यांचा शोध घेणे पोलिसांसाठी आव्हान होते. पिंपरी-चिंचवडमधील हिंजवडीत नोकऱ्यांसाठी मोठ्या प्रमाणावर परराज्यातील तरुण-तरुणी नोकरीच्या निमित्ताने स्थायिक झाले. एका बाजूला शहराचा विकास होतानाचे चित्र असताना हायप्रोफाईल वेश्या रॅकेटमुळे शहरात सध्या चिंतेचे वातावरण निर्माण झाले आहे. वेगवेगळे ग्रुप व्हॉटसअॅपच्या माध्यमातून या अवैध व्यवसायात सुलभपणे सक्रिय होतानाचे चित्र दिसते. शहरातील भीषण परिस्थिती रोखण्यासाठी पोलीस प्रशासन कसोशीने प्रयत्न करत आहे. पोलीस उपायुक्त गणेश शिंदे म्हणाले की, यापूर्वीही अशाप्रकारची कारवाई करण्यात आली आहे. या व्यवसायातील दलालांना अटकही करण्यात आली आहे. याविषयी कोणाला माहिती असेल तर त्या नागरिकांनी पुढे येऊन पोलिसांना सहकार्य करावे असे आवाहनही त्यांनी केले.
