तालुक्यातील सप्तश्रृंगी देवीच्या गडावर घाट रस्त्यात रविवारी सकाळी सात वाजता दरड कोसळून पुणे येथील भाविकांच्या गाडीचे मोठय़ा प्रमाणात नुकसान झाले. दरड व ढिगारा बाजुला केल्यानंतर गडावरील वाहतूक पुन्हा सुरळीत करण्यात आली. साडेतीन शक्तिपीठांपैकी अर्धपीठ असलेल्या सप्तश्रृंगी देवीच्या गडावर शनिवारी रात्रीपासूनच पावसाची रिपरिप सुरु झाली, ती रविवार सकाळपर्यंत कायम राहिली. पुणे येथील भाविक वसंत घाटगे हे पत्नी जयश्री यांच्यासह कारने गडावर आले होते. दर्शन घेऊन ते परतत असताना घाटात अचानक उंचावरून मोठे दगड, माती कोसळली. या घटनेत घाटगे दाम्पत्यास कोणतीही इजा झालेली नसली तरी त्यांच्या कारचे मोठे नुकसान झाले आहे. या घटनेमुळे वाहतूक काही वेळ बंद पडली. या घटनेची माहिती मिळाल्यावर गडावरील सामाजिक कार्यकर्ते संदीप बेनके, सनी जहागीरदार, राहुल बेनके, हेमंत कानडे, देवस्थानचे व्यवस्थापक सुदर्शन दहातोंडे, त्यांचे कर्मचारी तसेच गडावरील ग्रामस्थांनी घटनास्थळी जाऊन मदत कार्य सुरू केले. रस्त्यावरील मोठे दगड व माती बाजुला करून रस्ता वाहतुकीसाठी खुला केला. सर्व काम झाल्यावर सार्वजनिक बांधकाम खात्याचे कर्मचारी घटनास्थळी दाखल झाले. यावेळी वसंत घाडगे यांनी केवळ नशीब बलवत्तर म्हणून आपण वाचल्याचे नमूद केले.