मुंबई-पुणे महामार्गावरील ओझर्डे गावाच्या हद्दीत शनिवारी एका खासगी बसचा अपघात झाला. या अपघातात १६ प्रवासी जखमी झाले आहेत. यापैकी आठ प्रवाशांची प्रकृती गंभीर असून यामध्ये सहा महिलांचा समावेश आहे. तर अन्य आठ जण किरकोळ जखमी झाले. या जखमींना रुग्णालयात दाखल करण्यात आले आहे. चालकाचे बसवरील नियंत्रण सुटल्याने हा अपघात झाल्याचे समजते. ठाणे येथून जेजूरीला देव दर्शनासाठी जाणाऱ्या बसमधून १९ प्रवासी प्रवास करत होते. महामार्ग पोलिसांसह राणी, देवदूत टीमने घटनेची माहिती मिळताच घटनास्थळी धाव घेत मदत कार्याला सुरुवात केली. तळेगाव दाभाडे पोलीस पुढील तपास करत आहेत.
