पुण्यातील मंचर येथे सहा वर्षांचा मुलगा २०० फूट खोल बोअरवेलमध्ये पडला आहे. रवी पंडित असे या लहानग्याने नाव असून खेळता खेळता तो बोअरवेलमध्ये पडला. तो केवळ १० फूटांवर अडकला असण्याची शक्यता वर्तविण्यात येत आहे. मंचर पोलीसही याठिकाणी उपस्थित आहेत. तर घटना समजताच एनडीआरएफची तुकडी घटनास्थळी दाखल झाली. त्यानंतर त्याला बाहेर काढण्याचे शर्तीचे प्रयत्न सुरु आहेत. सायंकाळ झाल्याने अंधार पडल्यामुळे या मदतकार्यात अडचणी येत असल्याचेही समजले. या परिसरात रस्त्याचे बांधकाम सुरु असून अनेक कामगार या कामात सहभागी आहेत. रवीचे आई-वडिलही बांधकाम मजूर असल्याने तोही आई-वडिलांसोबत याठिकाणी होता. बोअरवेलवर कोणतेही झाकण नसल्याने खेळता-खेळता ६ वर्षांचा रवी थेट बोअरवेलमध्ये पडला. सायंकाळी ४.३० ते ५ वाजताच्या सुमारास ही घटना घडली.
