13 December 2019

News Flash

भरधाव एसटी गतिरोधकावरुन आदळल्याने प्रवाशाचा तुटला दात; गुन्हा दाखल

दिवसेंदिवस वाढत असलेल्या अशा चालकांच्या हलगर्जीपणाच्या गंभीर प्रकारांकडे एसटी प्रशासाने गांभीर्याने लक्ष घालावे अशी मागणी नेहमीच्या एसटी प्रवाशांकडून केली जात आहे.

पुणे : भरधाव एसटी गतिरोधकावर आदळल्याने एका प्रवाशाचा दात तुटला आहे.

एसटी बस चालकाच्या हलगर्जीपणामुळे प्रवाशाला आपला दात गमवावा लागल्याची गंभीर घटना समोर आली आहे. भोसरी येथे हा प्रकार घडला असून ज्या प्रवाशाचा दात तुटला आहे त्याने याप्रकरणी पोलिसांत तक्रार दाखल केली आहे.

पोलिसांच्या माहितीनुसार, भरत सोनू चिखले (वय ५५) असे जखमी झालेल्या प्रवाशाचे नाव आहे. बस चालकाविरोधात चिखले यांनी भोसरी पोलीस ठाण्यात तक्रार दिली आहे. त्यानुसार बस चालक नितीन भास्कर पाटील (वय ४५) यांच्या विरोधात गुन्हा दाखल करण्यात आला आहे. चिखले हे अमळनेर-पुणे बसने मंचर येथून पुण्याच्या दिशेने निघाले होते. त्यांना शेवटून दोन नंबरच्या सीटवर जागा मिळाली आहे. भोसरी उड्डाण पूल ओलांडल्यानंतर भरधाव वेगात असलेली एसटी अचानक गतिरोधकावरून जोरदार उसळी घेऊन आदळली. यामुळे जोरदार झटका बसून बसमधील अनेक प्रवासी काही फूट हवेत उडाले.

यावेळी एसटीतील स्क्रू निखळलेले एक सीट उडून थेट चिखले यांच्या दातावर आदळले यात त्यांचा एक दात पडला. काही वेळ त्यांच्या तोंडातून रक्तस्त्राव सुरू होता. दरम्यान, या घटनेप्रकरणी चिखले यांनी भोसरी पोलीस ठाण्यात धाव घेतली मात्र, तिथल्या पोलिस कर्मचाऱ्यांने त्यांना हे प्रकरण आपसांत मिटवून घेण्याचा सल्ला दिला. मात्र, चिखले तक्रारीवर ठाम राहिल्याने पोलिसांनी रात्री उशिरा गुन्हा दाखल करून घेतला आणि तपास सुरू केला.

एसटीचा प्रवास हा खासगी वाहनांपेक्षा सुरक्षित असतो अशी हमी एसटीकडून दिली जाते, त्यासाठी प्रवाशी विम्याची तरतूदही आहे. त्यामुळे अनेक नागरिक एसटी बसने प्रवास करण्यास प्राधान्य देतात. मात्र, बऱ्याचदा एसटी बसेसची अवस्था बिकट असल्याने तसेच चालक भरधाव वेगात बस दामटत असल्याने मोठे अपघात घडले आहेत. त्यामुळे दिवसेंदिवस वाढणाऱ्या या प्रकारांकडे एसटी प्रशासाने गांभीर्याने लक्ष घालावे अशी मागणी नेहमीच्या एसटी प्रवाशांकडून केली जात आहे.

First Published on November 12, 2019 2:01 pm

Web Title: the passengers tooth broken due to speedy st to dash down on speed breaker case file aau 85
Just Now!
X