..अन् ते (बि) घडले!

‘बेचैन जगा’, हा शिवशाहीर बाबासाहेब पुरंदरे यांनी दिलेला मंत्र..‘गरिबी आपणच आपल्या मानसिकतेतून निर्माण करतो!’, हे प्रसिद्ध बांधकाम व्यावसायिक डी. एस. कुलकर्णी यांचे स्फुरण देणारे शब्द.. आणि मुरलीधर शिंगोटे यांची वृत्तपत्रविक्रेता ते वृत्तपत्राचा मालक अशी उलगडलेली कारकीर्द.. अशा प्रेरक वातावरणात शेकडो तरूण एकत्र आले आणि ते ‘बि’ घडले!
निमित्त होते ‘डीएसके सेल्फ मेड मॅन’ पुरस्काराच्या वितरणाचे. हा पुरस्कार दै. पुण्यनगरीचे संस्थापक मुरलीधर शिंगोटे यांना बाबासाहेब पुरंदरे यांच्या हस्ते शुक्रवारी प्रदान करण्यात आला. डी. एस. कुलकर्णी यांच्या व्याख्यानाच्या ‘तुम्ही (बि)घडाना’ या डीव्हीडीचे प्रकाशनही या वेळी करण्यात आले. डीएसके यांच्या पत्नी हेमंती कुलकर्णी, पोलिस अधीक्षक प्रताप दिघावकर, आमदार अशोक पवार, आमदार विजय शिवतरे, अॅड. असीम सरोदे, अॅड. प्रमोद आडकर, सुनील महाजन या वेळी उपस्थित होते.
एके काळी भाजीविक्रेत्याचे काम करताना आपल्याला आलेले अनुभव आणि वडिलांनी दिलेली धडपड करत राहण्याची शिकवण बाबासाहेब पुरंदरे यांनी सांगितली. ते म्हणाले, ‘‘आयुष्यात कितीही प्रतिकूल परिस्थिती आली तरी माणसाने कष्ट करीत राहिले पाहिजे. चंगळवादी वृत्ती न बाळगता बेचैन जगले पाहिजे. मी पुस्तकांची पेटी डोक्यावर घेऊन पुस्तके विकली आहेत. पण कधी कुणाकडे देणगी मागितली नाही.’’
डी. एस. कुलकर्णी यांनी लहान व्यवसाय करता करता फोन पुसण्याच्या ‘टेलिस्मेल’च्या व्यवसायात घेतलेली उडी आणि तिथपासून डीएसके ग्रुपचा केलेला विस्तार विशद केला. त्यांनी सांगितले, ‘‘आचार्य अत्रे, ना. ग. गोरे, कॉम्रेड डांगे, यशवंतराव चव्हाण यांच्या ऐकलेल्या भाषणांचे माझ्या मनावर खोलवर संस्कार झाले. आपली गरिबी आपण आपल्याच मानसिकतेतून निर्माण करीत असतो. तेव्हा कोणतेही काम करायला कमीपणा वाटून न घेता कष्ट करण्याची तयारी ठेवणे आवश्यक आहे. आपल्या विचारांमध्ये स्पष्टता असावी. मोठे व्हायचे असेल तर आपले पाय मातीचे हवेत! ’’ श्याम भुर्के यांनी प्रास्ताविक केले. राजेश दामले यांनी सूत्रसंचालन केले.