अशी होणार प्रचाराची अखेर.!

कुणाकडे राष्ट्रीय नेत्याच्या सभेचे आकर्षण, कुणाकडे ‘रोड शो’ तर कुणाकडे अधिकाधिक मतदारांना भेटण्यावर भर.. प्रचाराचे काही तास उरले असताना मतदारांपर्यंत पोहोचण्यासाठी प्रत्येक पक्षाने काहीतरी खास धोरण आखले आहे. हे धोरण केवळ त्यांच्या प्रचारातच नव्हे तर सोशल नेटवर्किंगवरही दिसते आहे. काही प्रमुख राजकीय पक्षांच्या प्रचारकर्त्यांनी प्रचार संपता-संपता आपण काय करणार, याबाबतची व्यूहरचना सांगितली…
महाराष्ट्र नवनिर्माण सेना
मनसेच्या प्रचाराची सांगता शर्मिला ठाकरे यांच्या ‘रोड शो’ने होणार आहे. कोथरूडमधून रोड शोला सुरुवात होऊन सहाही विधानसभा मतदारसंघांमधील ठरावीक भागातून ही वाहने फिरतील, असे पक्षाचे समन्वयक दीपक दराडे यांनी सांगितले. तर मनसेच्या सोशल नेटवर्किंग टीमने दीपक पायगुडे यांच्या पुण्यासाठीच्या प्रमुख मुद्दय़ांचे २१ कलमी ‘इ-बुक’ तयार केले आहे. हे इ-बुक निवडणूक आयोगाकडे परवानगीस पाठवले असून प्रचार संपताना ते मतदारांच्या समोर मांडण्यासाठी पक्ष परवानगीच्या प्रतीक्षेत असल्याची माहिती पक्षाचे सोशल नेटवर्किंग प्रमुख अजय भारदे यांनी दिली. ‘सोशल प्रचारात मनसेने दीपक पायगुडे यांच्यासाठी ‘लोकसेवा ते लोकसभा’ हे कॅम्पेन सुरू केले होते. सामाजिक, राजकीय, सहकार, शिक्षण, संरक्षण, अध्यात्म, महिला सक्षमीकरण या प्रमुख मुद्दय़ांवर पक्षाने विविध पक्षांच्या उमेदवारांच्या कामाचा तुलनात्मक तक्ता तयार केला आहे. हा तक्ता आणि पायगुडे यांचे या सात क्षेत्रातले काम सोशल नेटवर्किंगद्वारे पुढे ठेवणार आहोत,’ असे भारदे म्हणाले.
भारतीय जनता पक्ष
प्रचाराच्या शेवटच्या दिवशी पक्षातर्फे डॉ. बाबासाहेब आंबेडकर पुतळ्यापासून कोथरूडपर्यंत दुचाकी फेरी काढण्यात येणार आहे. सर्व विधानसभा मतदारसंघांमधून ही फेरी जाणार असून उमेदवारासह सर्व कार्यकर्ते सहभागी होणार असल्याची माहिती पक्षाचे समन्वयक मंदार घाटे यांनी दिली. तर पक्षाचे सोशल नेटवर्किंग प्रमुख निखिल देशपांडे म्हणाले, ‘‘प्रचाराच्या समारोपाला आम्ही मतदानाची टक्केवारी वाढवण्यावर अधिक भर देत आहोत. मतदारयादीतील नावे शोधणे जिकिरीचे असल्याची बऱ्याच जणांची तक्रार असते. ही नावे शोधण्यासाठी आम्ही शेवटच्या दोन दिवसांत फेसबुकवर आवश्यक संकेतस्थळांच्या लिंक्स देत आहोत. मतदारयादीत नाव चुकीचे छापले जाणे, मतदान ओळखपत्र असूनही मतदान करताना काही अडचणी येणे किंवा कुठे बोगस मतदान होण्यासारखे प्रकार आढळणे अशा तक्रारी नागरिक आम्हाला फेसबुकवरील मेसेज बॉक्सवर कळवू शकणार आहेत. संदेश करणाऱ्या व्यक्तीचे नाव इतरांना कळणार नाही व आमचे कार्यकर्ते त्यांना मदत करण्याचा प्रयत्न करतील.’’
काँग्रेस
राहुल गांधी यांची सभा हे काँग्रेसच्या प्रचाराच्या समारोपाचे आकर्षण ठरेल, असे पक्षाचे समन्वयक प्रवीण वाळिंबे यांनी सांगितले. पक्षाचे सोशल नेटवर्किंग प्रमुख सत्यजित हांगे म्हणाले, ‘‘सोशल प्रचारात काँग्रेसने शेवटच्या आठवडय़ासाठी ‘पुणे आता तरुण होणार’ आणि ‘व्ही फॉर व्हिक्टरी’ ही दोन कॅम्पेन्स सुरू केली आहेत. या दोन्ही संकल्पनांसाठी फेसबुकवर वेगवेगळी पोस्टर तयार करून टाकण्यात आली आहे. ‘पुणे आता तरुण होणार’ या संकल्पनेत अनुभवीपणाला तरुणाईची साथ मिळणार असे अभिप्रेत आहे, तर ‘व्ही फॉर विश्वजित, व्होट आणि व्हिक्टरी’, अशी दुसरी संकल्पना आहे.’’ पक्षाच्या पुण्यासाठीच्या जाहीरनाम्यातील महत्त्वाचे ४ ते ५ मुद्दे फेसबुक व इतर सोशल मीडियामधून मांडत आहोत, असेही हांगे यांनी सांगितले.
आम आदमी पक्ष
‘आप’चे समन्वयक तन्मय कानिटकर म्हणाले, ‘‘प्रचाराचा शेवट रॅलीने करण्यापेक्षा ‘आप’चे कार्यकर्ते शहरात दिवसभर दारोदार फिरून प्रचार करणार आहेत. सकाळी ७ वाजल्यापासून प्रचार संपेपर्यंत आम्ही लोकांना भेटणार आहोत. मंगळवार हा कामाचा दिवस असल्यामुळे आम्ही प्रामुख्याने कार्यालये आणि दुकानांमध्ये जाणार आहोत.’’ ‘आप’च्या सोशल प्रचारात पक्षाने पुण्यासाठी प्रसिद्ध केलेल्या संकल्पपत्रातील प्रमुख मुद्दे दिसणार असल्याचे पक्षाचे सोशल नेटवर्किंग प्रमुख दिव्यांग बलदोटा यांनी सांगितले. ते म्हणाले, ‘‘आम्ही ४-५ दिवसांपासून फेसबुक आणि वेबपेजवर कृष्णधवल व्यंगचित्रे टाकायला सुरुवात केली आहे. तांबोळी काका या आमच्या कार्यकर्त्यांनी काढलेले राजकीय परिस्थितीवर भाष्य करणारे एक व्यंगचित्र आम्ही रोज अपलोड करतो.’’