पुणे : बेकायदा गुटखा वाहतूक करणाऱ्या टेम्पोचालकाला गुन्हे शाखेच्या अमली पदार्थ विरोधी पथकाने अटक केली. या कारवाईत पोलिसांनी आठ लाख ७१ हजारांचा गुटखा, टेम्पो असा १३ लाख ८१ हजार ९६० रुपयांचा मुद्देमाल जप्त केला. सिराज नूरआलम मनसुरी (वय २९, रा. नूर मशिदीजवळ, कोंढवा) असे अटक करण्यात आलेल्याचे नाव आहे. कोंढव्यातील येवलेवाडी भागात टेम्पोतून गुटख्याची वाहतूक केली जात असल्याची माहिती अमली पदार्थ विरोधी पथकाला मिळाली. पोलिसांच्या पथकाने टेम्पो अडवला. टेम्पाेची तपासणी केली असता टेम्पोत गुटखा सापडला. टेम्पोचालक मनसुरीची चाैकशी करण्यात आली. पुरंदर तालुक्यातील गोदामात गुटख्याचा साठा ठेवल्याची माहिती त्याने दिली. बोपगावमधील गोदामातून पोलिसांनी गुटख्याचा साठा जप्त केला. पोलिसांनी आठ लाख ७१ हजारांचा गुटखा, टेम्पो असा मुद्देमाल जप्त केला. सहायक पोलीस आयुक्त नारायण शिरगावकर यांच्या मार्गदर्शनाखाली अमली पदार्थ विरोधी पथकाचे पोलीस निरीक्षक सुनील थोपटे यांच्या मार्गदर्शनाखाली उपनिरीक्षक दिगंबर चव्हाण, एस. डी. नरके, संतोष देशपांडे, प्रशांत बोमादंडी, संदीप जाधव, मयूर सूर्यवंशी आदींनी ही कारवाई केली.
