भाजप आमदाराची मुख्यमंत्र्यांकडे मागणी पिंपरी : ‘द काश्मीर फाईल्स’ हा चित्रपट संपूर्ण महाराष्ट्रात करमुक्त करा, अशी मागणी भाजपचे आमदार व पिंपरीचे शहराध्यक्ष महेश लांडगे यांनी मुख्यमंत्री उद्धव ठाकरे यांच्याकडे केली आहे. आमदार लांडगे यांनी याबाबतचे निवेदन ठाकरे यांना दिले आहे. जम्मू काश्मीरमध्ये दहशतवादाला बळी पडलेल्या हिंदू पंडितांवरील अन्यायावर भाष्य करणारा हा चित्रपट असून नुकताच सर्वत्र प्रदर्शित झाला आहे. दहशतवाद्यांनी केलेल्या अत्याचाराची वास्तविकता या चित्रपटातून मांडण्यात आली आहे. अधिकाधिक नागरिकांना चित्रपट पाहता यावा, यासाठी तो करमुक्त करावा. याआधी गुजरात, हरियाणा, कर्नाटक, उत्तर प्रदेशात हा चित्रपट करमुक्त केला आहे. त्या धर्तीवर महाराष्ट्र सरकारने तत्काळ निर्णय घ्यावा, अशी मागणी लांडगे यांनी निवेदनात केली आहे.
