राज्यातील मंदिरे उघडण्यासही शासनाने आता परवानगी द्यावी, या मागणीसाठी अखिल भारतीय ब्राह्मण महासंघाच्यावतीने पुण्यात शंखनाद आंदोलन करण्यात आले. मंगळवारी ग्रामदैवत आणि मानाचा पहिला कसबा गणपती मंदिराबाहेर हे आंदोलन करण्यात आले. यावेळी महासंघाचे आनंद दवे म्हणाले, "राज्यातील अनेक भागात करोना विषाणूचे रुग्ण मोठ्या प्रमाणावर आढळत आहे. रुग्ण संख्या नियंत्रणात येण्याच्या दृष्टीने, सरकार प्रयत्न करीत आहे. लॉकडाउनच्या काळात केवळ अत्यावश्यक सेवेतील दुकाने सुरू होती, त्यानंतर आता लॉकडाउन शिथिल केल्याने सर्व प्रकाराची दुकाने सुरू करण्यात आली आहेत. मात्र, मंदिरं, नाट्यगृह, शॉपिंग मॉल अद्यापही बंद आहेत. या पार्श्वभूमीवर सरकारने आता मंदिरेही लवकरात लवकर सुरु करावीत. सकाळी किंवा संध्याकाळी किमान दोन तास तरी मंदिरे चालू ठेवण्यास परवानगी देण्यात यावी. यासाठी शासनाच्या सर्व नियमांचे पालन केले जाईल. मंदिरे सुरू झाल्यास त्यांच्याशी निगडित असलेल्या नागरिकांचा रोजगारही सुरु होण्यास मदत होईल"
