पिंपरी : चिंचवड रेल्वे स्थानकाजवळील ४९ वर्षांपूर्वीचा कमकुवत झालेला जुना रेल्वे उड्डाणपूल पाडण्यात येणार आहे. तज्ज्ञांचा स्थापत्य विषयक लेखापरीक्षण (स्ट्रक्चरल ऑडिट) अहवाल आणि रेल्वे विभागाच्या मंजुरीनंतर महापालिकेने हा निर्णय घेण्यात आला आहे. जुना पूल पाडून नवीन पूल उभारला जाणार आहे.
मुंबई-पुणे महामार्गावर महावीर चौकातून चिंचवड गावाकडे जाणारा डाव्या बाजूचा रेल्वे उड्डाणपूल १९७६ मध्ये बांधण्यात आला होता. या पुलाच्या उजव्या बाजूला समांतर उड्डाणपूल २००४ मध्ये बांधण्यात आला आहे. सन १९७६ मध्ये बांधण्यात आलेला जुना पूल स्थापत्य विषयक लेखापरीक्षणनुसार कमकुवत असल्याचे आढळून आले. या अहवालानंतर महापालिकेने जुन्या पुलावर हलकी वाहने आणि दुचाकी वगळता इतर वाहनांना जाण्यास प्रतिबंध केला. त्यामुळे येथून जाणारी जड वाहने आणि बसेस यांना पर्यायी मार्गांचा वापर करावा लागत होता.
या पार्श्वभूमीवर हा जुना पूल पाडून त्याजागी नवीन पूल बांधण्याबाबत महापालिकेने विविध संस्थांकडून तांत्रिक आढावा घेतला. २०२१ मध्ये केलेल्या स्थापत्य विषयक लेखापरीक्षणमध्ये आणि २०२२ मध्ये पिंपरी-चिंचवड कॉलेज ऑफ इंजिनिअरिंगने केलेल्या पुनर्वलोकनानुसार जुना पूल पाडण्याची शिफारस करण्यात आली. त्यानंतर रेल्वे विभागाने डिसेंबर २०२४ मध्ये जुना रेल्वे उड्डाणपूल पाडण्यासाठी आणि नवीन पुलाच्या आधुनिक पुनर्बांधणीसाठी संमती दिली. त्यामुळे आता लवकरच येथील जुना पूल पाडून नवीन पूल उभारला जाणार आहे. रेल्वे विभागाच्या मंजुरीनंतर येथे नवीन पूल उभारण्याचा मार्ग मोकळा झाला आहे. त्यासाठी प्रकल्प व्यवस्थापन सल्लागाराची नियुक्ती करण्यात आल्याचे मुख्य अभियंता प्रमोद ओंभासे यांनी सांगितले.
नवीन उड्डाणपूल उभारल्यानंतर प्रवाशांचा प्रवास सुरक्षित होईल. वेळेची बचतही मोठ्या प्रमाणात होईल. यामुळे परिसरातील वाहतूक कोंडी कमी होईल.
विजयकुमार खोराटे, अतिरिक्त आयुक्त, पिंपरी-चिंचवड महापालिका
चिंचवड रेल्वे स्थानकाजवळील जुन्या उड्डाणपुलाला जवळपास ५० वर्षे पूर्ण झाली आहेत. तज्ज्ञांच्या मूल्यांकनातून आणि नागरिकांचा अभिप्राय लक्षात घेऊन येथे नवीन पूल उभारण्यात येणार आहे. रेल्वे विभागाची यासाठी मंजुरी मिळाली असून येथे नवीन पूल उभारण्यासाठी कार्यादेश देण्यात आला आहे. शेखर सिंह, आयुक्त, पिंपरी-चिंचवड महापालिका
