ऐंशी वर्षांत १३०० चित्रपट, माहेरची साडी १२८ आठवडे!

ऐंशी वर्षांत १३०० चित्रपट प्रदर्शित, सलग अडीच वर्षे चाललेला ‘माहेरची साडी’ हा चित्रपट, गेली ३८ वर्षे मराठी चित्रपटांचेच खेळ, बालगंधर्व यांचा अभिनयाचा साक्षीदार, व्ही. शांताराम-फत्तेलाल या दिग्गजांचा संबंध.. अशा अनेक आठवणी प्रभात चित्रपटगृहाने गेल्या ८० वर्षांच्या काळात जोपासल्या आहेत. ते राहणार की जाणार हे पुढील महिनाभरात स्पष्ट होणार आहे.
‘प्रभात’चा करार जानेवारी महिन्यात संपत आहे. २१ सप्टेंबर १९३४ रोजी प्रभात फिल्म कंपनीने आता ज्या जागेवर आहे ती जागा भाडेपट्टय़ावर घेतली. तेव्हापासून आतापर्यंतच्या ८० वर्षांच्या काळात या चित्रपटगृहाने अनेक आठवणी जपल्या आहेत. ते किबे लक्ष्मी थिएटर या नावानेही ओळखले जाते. ‘प्रभात’ मध्ये मराठी, हिंदी, इंग्रजी अशा तिन्ही भाषेतील चित्रपट प्रदर्शित झाले आहेत. पहिला सिनेमा होता इंग्रजी, म्युझिकल कॉमेडी या प्रकारातील. नाव होते- ‘लव्ह मी टू नाइट.’ पहिला मराठी चित्रपट प्रदर्शित झाला- अमृतमंथन. ८० वर्षांच्या काळात तिन्ही भाषेतील एकूण १३०० चित्रपट प्रदर्शित झाले आहेत. शेवटचा दीर्घ काळ चाललेला हिंदी चित्रपटच होता- जितेंद्र-जयाप्रदा यांचा ‘तोहफा’. गेल्या ३८ वर्षांत मात्र नाममात्र अपवाद वगळता सर्व मराठी चित्रपट प्रदर्शित झाले आहेत. या ठिकाणी सर्वाधिक काळ चाललेला चित्रपट आहे- माहेरची साडी. तो सलग तब्बल १२८ आठवडे चालला. याशिवाय सुवर्ण महोत्सवी (५० आठवडे) आणि रौप्यमहोत्सवी (२५ आठवडे) अनेक चित्रपट चालले.
प्रभात हे चित्रपटगृह आणि नाटय़गृह म्हणूनही वापरले जायचे. तेथे बालगंधर्व यांचेही प्रयोग झाले आहेत.