पुणे : दोन हजार रुपयांच्या नोटा बदलून घेण्यासाठी देशातील सार्वजनिक क्षेत्रातील सर्वात मोठी बँक असलेल्या स्टेट बँक ऑफ इंडियाने नियमावली जाहीर केली असून त्यासाठी कोणताही अर्ज भरून घेतला जाणार नसल्याचे स्पष्ट केले आहे. तसेच नोटा बदलून घेण्यासाठी ग्राहकांना ओळखपत्रही दाखवावे लागणार नसल्याचे बँकेने म्हटले आहे. रिझर्व्ह बँकेने शुक्रवारी (१९ मे) दोन हजार रुपयांच्या नोटा चलनातून बाद करण्याचा निर्णय घेतला. या नोटा मंगळवार, २३ मेपासून सर्व बँका अथवा रिझर्व्ह बँकेच्या विभागीय कार्यालयांमध्ये बदलून मिळणार आहेत. नोटा बदलून देण्यासाठी बँकांकडून अर्ज भरून घेतला जाणार असल्याचे संदेश समाजमाध्यमांवर पसरले आहेत. या पार्श्वभूमीवर स्टेट बँकेने नोटा बदलण्याबाबत नियमावली जाहीर केली असून असा कोणताही अर्ज लिहून घेतला जाणार नसल्याचे जाहीर केले आहे. याबाबत स्टेट बँकेचे मुख्य सरव्यवस्थापक एस. मुरलीधरन यांनी स्पष्ट केले की, बँकेच्या कोणत्याही शाखेमध्ये येऊन नागरिक नोटा बदलून घेऊ शकतात. त्यासाठी एका वेळी २० हजार रुपयांची मर्यादा आहे. नागरिकांकडून बँक कोणताही अर्ज लिहून घेणार नाही. त्याबरोबरच नोटा बदलताना संबंधित नागरिकाच्या ओळखीचा कोणताही पुरावा मागितला जाणार नाही. बँकांमध्ये आधीच गर्दी नागरिकांना दोन हजारच्या नोटा २३ मेपासून बदलून घेता येतील, असे रिझर्व्ह बँकेने यापूर्वीच जाहीर केले. तरीही शनिवारी (२० मे) अनेकांनी नोटा बदलून घेण्यासाठी बँकांमध्ये गर्दी केल्याचे चित्र दिसले. ग्राहकांची समजूत काढून त्यांना परत पाठविण्याचे काम बँक कर्मचारी आणि अधिकाऱ्यांना करावे लागले. चलनातील नोटा मार्च २०१८ मध्ये ६.७३ लाख कोटीमार्च २०२३ मध्ये ३.६२ लाख कोटीवितरणातील चलनात सध्या प्रमाण १०.८%