घरी जायला बस नसल्याने तरुणाने पीएमपी बस चोरली !

कोथरूड येथे बहिणीकडे आलेल्या तरुणाने मध्यरात्री परत जाण्यास बस नसल्यामुळे पीएमपीएल डेपोमधील बसच चोरून नेली. चोरलेल्या बसमध्ये तो आईला घेऊन लोणीकाळभोरकडे जात असताना वेडीवाकडी बस चालवत असल्याचे दिसून आल्याने सकाळी गस्तीवरील पोलिसांनी त्याला पकडल्यानंतर हा प्रकार उघडकीस आला. हा तरुण मनोरुग्ण असल्याची शक्यता पोलिसांनी व्यक्त केली आहे.
दशरथ मोहन पोळ (वय २७, रा. चाकण, मूळगाव- आंबुस, जि. लातूर) असे अटक केलेल्या तरूणाचे नाव आहे. पोलिसांनी दिलेल्या माहितीनुसार, पोळ हा चाकण येथे एका कंपनीत कामाला आहे. त्याने काही काळ चालक म्हणूनही काम केले आहे. गुरूवारी तो कोथरुडला बहिणीकडे आला होता. मध्यरात्री चाकणला परत जाण्यासाठी वाहन नसल्याने तो कोथरूड पीएमटी डेपोमध्ये गेला. रात्री दीडच्या सुमारास बसच्या चालकाने सीएनजी गॅस भरून बस कोथरूड पीएमटी डेपो येथे चावी तशीच ठेवून गेला होता. रात्री दीडच्या नंतरच पोळ याने ती बस चालू करून आईला घेऊन तो लोणीकाळभोरकडे गेला.
 सकाळी लोणीकाळभोर पोलीस ठाण्याचे पोलीस निरीक्षक सुहास गरुड यांना एक पीएमपीएल बस वेडीवाडी पद्धतीने चालवत असल्याची मिळाली. त्यानुसार पोलिसांनी सकाळी साडेआठ वाजता लोणी फाटय़ावर बस अडवून त्याच्याकडे चौकशी केल्यानंतर हा प्रकार उघडकीस आला. पोळ हा पोलिसांना माहिती प्रत्येक वेळी वेगवेगळी देत असून तो मानसिक रुग्ण असण्याची शक्यता आहे. मात्र, त्याची वैद्यकीय चाचणी केल्यानंतर तो मानसिक रुग्ण आहे का हे समजेल. लोणीकाळभोर पोलिसांनी वेळीच ही बस पकडल्यामुळे मोठा अनर्थ टळला. पोलिसांनी त्याला पकडेपर्यंत बस चोरीला गेल्याची माहिती पीएमपीएमएलच्या चालकाला नव्हती. पीएमपीने ही बस कंत्राटी पद्धतीने चालविण्यासाठी एका कंपनीला दिलेली आहे. याप्रकरणी लोणीकाळभोर पोलिसांनी त्याला पकडून कोथरुड पोलिसांच्या ताब्यात दिले आहे. याप्रकरणी पोळला कोथरुड पोलिसांनी अटक केली असून अधिक तपास वरिष्ठ पोलीस निरीक्षक कल्याणाराव विधाते करत आहेत.