लोकमानस: ‘हे’ राज्यांच्या अधिकारांवर अतिक्रमण

सीमांवर अधिक सतर्क राहावे लागेल

‘मुनीरशाही!’ हा अग्रलेख (१४ नोव्हेंबर) वाचला. मुनीर यांनी २७ व्या घटनादुरुस्तीने आपली लष्करशाहीची भूक भागवून घेतली आहे. याआधी सैन्य दलाचे नियंत्रण आणि परिचालन केंद्र सरकारच्या अध्यक्षांकडे होते आता तिन्ही दलांचे प्रमुखपद सय्यद असीम मुनीर यांच्याकडे असल्याने सरकारचे नियंत्रण लष्करप्रमुखांवर नसणार. ऑपरेशन सिंदूरदरम्यान मुनीर यांनी जी खिंड लढवलेली (भले ती अपयशी ठरली असली तरी) त्यामुळे त्यांना ‘फील्ड मार्शल’ असा किताब बहाल करण्यात आला. लोकशाहीचा गळा घोटल्यानंतर आता न्यायव्यवस्थाही लष्करशहाच्या आधिपत्याखाली असणार आहे. आता देशाचे पंतप्रधान शहाबाज शरीफ नामधारी होऊन असीम मुनीर हे सर्वेसर्वा होणार, यात शंकाच नाही. मुनीर यांची युद्धपिपासू वृत्ती पाहता यापुढे भारताला सीमा भागात पाकिस्तानच्या कुरघोडीविषयी सदासर्वकाळ सतर्क राहावे लागणार आहे.- अरविंद बेलवलकर, अंधेरी (मुंबई)

शिस्तपालनाअभावी, हेच होणार!

‘कंटेनरची वाहनांना धडक’ हे वृत्त (लोकसत्ता- १४ नोव्हेंबर) वाचले. यानिमित्ताने नवले पूल पुन्हा एकदा चर्चेत आला आहे. दुर्दैवाने आणखी काही निष्पाप जीव काहीही कारण नसताना गेले. मुंबईकडे येणाऱ्या मार्गिकेवर आजवर अनेकदा अपघात झाले आहेत. कात्रज घाटापासून नवले पुलापर्यंत असणारा अति उतार आणि बेदरकार वाहने चालवणारे वाहनचालकच, खास करून जड वाहने याला जबाबदार आहेत. प्रशासनाने काही उपाय नक्कीच केले आहेत. या पूर्ण भागावर रम्बलर बसवले गेले आहेत, स्पीड कॅमेरे बसवले आहेत परंतु अपघाता काही कमी झालेले नाहीत. मी या रस्त्यावरून नेहमी ये-जा करतो. माझे एक निरक्षण असे आहे की जड वाहने डावीकडील मार्गिकेवरून चालवावीत असा नियम असला तरी बहुतेक जड वाहने हमखास उजवीकडील मार्गिकेवरून चालविली जातात. यामुळे लहान वाहनांना डावीकडून प्रवास करावा लागतो आणि हे अपघाताचे एक मुख्य कारण आहे. आजच्या अपघातात हे पुन्हा दिसून आले. कॅमेरे काय वाहतूक पोलीससुद्धा यावर काही कार्यवाही करताना दिसत नाहीत. जोपर्यंत मार्गिकेची शिस्त आणि इतर नियमांचे पालन सर्व वाहनचालक करणार नाहीत तोपर्यंत निष्पाप जीव जात राहणार. दोन दिवस बातम्या दाखवल्या जाणार आणि नंतर, येरे माझ्या मागल्या…-अशोक फडतरे, ठाणे

रस्त्यांवरील वाढता ‘दहशतवाद’

‘कंटेनरची वाहनांना धडक’ ही बातमी वाचली. अनेक चालक अतिवेगाने आणि बेदरकारपणे वाहने चालवून नियमांचे उल्लंघन करतात. मद्यापान करून वाहने चालवणाऱ्यांची संख्याही लक्षणीय आहे. वाहन चालवताना मोबाइलवर बोलण्यामुळेही अनेक अपघात होतात. ओव्हरटेक करताना होणाऱ्या अपघातांचे प्रमाण मोठे आहे. रस्त्यांवरील खड्डेही अपघातांत भर घालतात. धुके, पाऊस किंवा रात्रीच्या वेळी कमी प्रकाश यामुळे रस्ते स्पष्ट दिसत नाहीत आणि अपघात होण्याची शक्यता वाढते. ओल्या किंवा निसरड्या पृष्ठभागामुळे वाहन घसरू शकते. ब्रेक फेल झाल्याने, टायर फुटल्याने किंवा खराब झाल्यामुळे अपघात होतात. पादचाऱ्यांनीही नियमांचे पालन करणे गरजेचे आहे. त्यातूनही अपघातांचे प्रमाण काही प्रमाणात कमी होऊ शकेल. रस्त्यांवरील बेदरकार वाहनचालकांचा ‘दहशतवाद’ वाढला आहे, हे निश्चित. त्यात काही घट झाली, तर लोकांचे जीवन सुकर होईल.- प्रा. जयवंत पाटील, भांडुप (मुंबई)