देशप्रेमाचे प्रश्नोपनिषद

प्रश्न फार म्हणजे अतिच गंभीर आहेत. रविवारी दुपारचे जागरण करून अनेकानेक देशप्रेमी नागरिकांनी भारत विरुद्ध पाकिस्तान यांच्यातील क्रिकेट सामना पाहिला तर त्या समस्तांवर राजद्रोहाचा खटला चालवावा काय? म्हणजे बोवा तिकडे सीमेवर तर रोज तोफगोळाफेकीचा सामना चालू आहे. आपले जवान त्यात शहीद होत आहेत आणि आपले सर्व प्रकारचे म्हणजे गोमातेपासून भारतमातेपर्यंतचे सुपुत्र मात्र चवीचवीने ते कसलेसे क्रिकेट पाहात आहेत. आता यास काय बरे म्हणावे? की योगीजींनी अ‍ॅण्टी क्रिकेट स्क्वाड काढल्याशिवाय आपण देशभक्ती शिकणारच नाही? की हे दोन देश तिसऱ्याच देशात एकमेकांविरुद्ध खेळले तर त्यात भक्तीला डंख लागत नाही व तेच जर एकमेकांच्या प्रांगणात एकमेकांविरुद्ध उभे ठाकले तर मात्र सविनय भक्तिभंग घडतो? शिवाय यात एक उपप्रश्न असाही आहे, की आयसीसीनामक संस्थेने सामना भरविला असेल, तर त्याचे वजन देशभक्तीपेक्षा अधिक असते? फारच अवघड प्रश्न आहेत हे. म्हणजे असे वाटते आहे, की कुठे बरे गेला आहे तो आपला सळसळता, उकळता, उफळता, उफाडय़ाचा देशाभिमान? कधी कधी तर डोळ्यांसमोर असेही सवालिया निशान फडकू लागते, की आपण जनगणमन म्हणतो, त्यातून राजद्रोहाचा गुन्हा तर होत नाही ना? इतर कुठे नाही पण कर्नाटक देशी तर तसे होत नसेल ना? म्हणजे बघा आधीच आपल्याकडील काहींतील अनेकांना ते राष्ट्रगीतच अमान्य आहे. का की त्यांच्या मते त्यातले ते अधिनायक कोणी तरी भलतेच आहेत.