गौरव श्रावगी

It is not in the stars to hold our destiny, but in ourselves. – William Shakespeare.
अकोट या गावातल्या गौरव श्रावगीची गोष्ट या वाक्याचा प्रत्यय देणारीच आहे! बहुतेकांनी कधी ऐकलेही नसेल असे हे तालुक्याचे गाव.. अकोला जिल्ह्य़ातले! सर्वात कठीण समजल्या जाणाऱ्या, या वर्षी तर अवघा तीन टक्के निकाल लागलेल्या चार्टर्ड अकाउंटंटच्या परीक्षेत गौरव देशात पहिला आला. शहरातली मुले, त्यांचा स्मार्टनेस, त्यांना मिळणाऱ्या सुविधा आणि त्यावर बेतलेले यश.. अशा सगळ्या भ्रमांना गौरवने सुरुंग लावला.
गौरव श्रावगी हा मध्यमवर्गीय कुटुंबातील मुलगा. वडील दीपक श्रावगी हे होमिओपॅथीचे डॉक्टर, आई गृहिणी आणि लग्न झालेली मोठी बहीण असे चौकोनी कुटुंब. गौरवचे दहावीपर्यंतचे शिक्षण हे अकोटमधल्या शाळेत झाले, तर अगदी अकरावीपासून सीएपर्यंतचे शिक्षण नागपूरमध्ये. दहावीला त्याला ९० टक्के गुण मिळाले होते. साहजिकच ९० टक्के गुण मिळाल्यामुळे प्रथेप्रमाणे गौरवने विज्ञान शाखेला प्रवेश घेतला. त्या वेळी आयआयटीमध्ये प्रवेश घ्यायचा असेच त्याचेही स्वप्न होते. बारावीला विज्ञान शाखेत गौरवला ९४ टक्के गुण मिळाले. पाहिलेल्या स्वप्नाप्रमाणे अभियांत्रिकीला प्रवेश मिळणेही सहज शक्य होते. मात्र, या टप्प्यावर जात्याच हुशार, व्यवहारी आणि काहीशा बिनधास्त गौरवने धाडसी वाटावा असा निर्णय घेतला.. नागपूरमध्येच बीकॉम करण्याचा. आर्थिक मंदी, अभियांत्रिकीच्या विद्यार्थ्यांमध्ये वाढणारी बेकारी.. या पाश्र्वभूमीवर अभियांत्रिकीला न जाता सीए करायचे त्याने ठरवले.   ‘मंदी पथ्यावर पडलेला मी एकटाच असेन!’ असे गौरव सांगतो. २०१२ मध्ये गौरव बीकॉम झाला. बीकॉम करत असतानाच त्याने सीएची तयारी सुरू केली. सीएच्या प्रवेश परीक्षेत (सीपीटी किंवा कॉमन प्रोफिशियन्सी टेस्ट) तो देशात तेविसावा आला होता आणि त्यानंतर आता सीए फायनलमध्ये देशात पहिला..तेही पहिल्याच प्रयत्नात! दहावीनंतर अकोटसारख्या गावातून नागपूरमध्ये गेल्यानंतर बदललेल्या वातावरणाशी जुळवून घेण्यासाठी गौरवलाही बरेच टक्केटोणपे खावे लागले.  गौरव सांगतो, ‘नागपूरही त्या वेळी खूप मोठं वाटायचं. बदललेलं वातावरण, एकीकडे अनेक छान वाटाव्यात अशा गोष्टी, काही वेळा न्यूनगंड.. वातावरणाशी जुळवून घेणं थोडं कठीण गेलं. पण कष्टाशिवाय पर्याय नाही आणि लोकांशी स्पर्धा करणे, तुलना करणे यापेक्षा ‘स्वत:शी केलेली स्पर्धाच खरी’ हे या वातावरणातूनच कळलं.’  गौरवला सध्या तरी नोकरीच करायची आहे. अर्थातच देशातल्या अनेक मोठय़ा कंपन्यांनी कधी न ऐकलेल्या महाराष्ट्राच्या नकाशातल्या ‘अकोट’चा आणि ‘तुम्ही कुठे राहता यापेक्षा तुम्ही काय करता हे महत्त्वाचे असते.’ हे सिद्ध करणाऱ्या गौरवचा शोध आतापासूनच सुरू केला असेल!