गुंड विकास दुबेचे साथीदार अरविंद त्रिवेदी आणि सुशीलकुमार तिवारी या दोघांना १६ जुलैपर्यंत ट्रान्झिट रिमांड ठाणे न्यायालयाने सोमवारी मंजूर केला. उत्तर प्रदेश पोलीस या दोघांचा ताबा मिळविण्यासाठी ठाणे न्यायालयात आले होते. रस्ते मार्गाने उत्तर प्रदेशला जाताना वाहनाचा अपघात होण्याची भीती असल्याने आम्हाला विमानाने न्यावे, असा अर्ज आरोपींनी केला होता. या अर्जाला न्यायालयाने मंजुरी दिली आहे, अशी माहिती आरोपीचे वकील अनिल जाधव यांनी दिली. ठाणे ते कानपूर हे अंतर फार मोठे आहे. तसेच पावसाळा सुरू असल्याने रस्तेही निसरडे झालेले आहेत. त्यामुळे पोलिसांसोबत जाताना अपघात होऊ शकतो. असा अर्ज न्यायालयात केला होता.
