कल्याण : कल्याणमधील आधारवाडी कारागृहातील २० कैद्यांना करोनाची लक्षणे दिसून आली आहेत. खबरदारी आणि अधिक उपचारांसाठी त्यांना ठाणे जिल्हा शासकीय रुग्णालयात दाखल करण्यात आले आहे, अशी माहिती तुरुंगातील अधिकाऱ्याने दिली. या कैद्यांमध्ये करोनाची सौम्य लक्षणे दिसून आली आहेत. कोणताही कैदी गंभीर नाही, असे सूत्राने सांगितले. विविध गुन्ह्यांत सहभागी असलेले हे कैदी कल्याण जिल्हा व सत्र न्यायालयाने एका आदेशाने आधारवाडी तुरुंगात अलीकडे पाठविले होते. कारागृहात येणाऱ्या प्रत्येक कैद्याची करोना चाचणी करण्यासाठी तुरुंगात दोन खोल्या राखीव आहेत. तेथे न्यायालयाच्या आदेशाने दाखल होणाऱ्या कैद्याची चाचणी केली जाते. मगच त्या कैद्याला तुरुंगातील कोठडीत पाठविले जाते.