उल्हासनगरात मराठी उमेदवारांची चलती

सिंधीबहुल राजकारणासाठी ओळखल्या जाणाऱ्या उल्हासनगरात यंदा सर्वच पक्षांनी मराठी उमेदवारांना प्राधान्य दिल्याचे चित्र असून भाजप आणि ओमी कलानी यांच्या आघाडीतही मराठी उमेदवारांची चलती दिसत आहे. युती तुटल्याने शिवसेनेकडून या ठिकाणी मराठीबहुल मतांचे राजकारण केले जात असल्याने या मतांचे ध्रुवीकरण टाळण्यासाठी भाजपनेही यंदा मराठी उमेदवारांना प्राधान्य दिले आहे. येथील साई पक्षाकडून सर्वाधिक सिंधी उमेदवारांना रिंगणात उतरविण्यात आल्याने या पक्षाने मात्र सिंधीबहुल मतांचे राजकारण सुरू केले आहे.

विधानसभा निवडणुकीत शिवसेना-भाजपची युती तुटल्याने सिंधीबहुल मतांचे राजकारण करत राष्ट्रवादीच्या ज्योती कलानी यांनी भाजपचे कुमार आयलानी यांचा मोठय़ा मताधिक्याने पराभव केला होता. येथील पप्पू कलानी यांच्या राजकारणाला आव्हान उभे करताना भाजपला नेहमीच शिवसेनेची साथ लागली आहे. शिवसेना सोबत असली की मराठी मतांचे ध्रुवीकरण होते आणि कलानी यांच्याविरोधात ते पथ्यावर पडते असा भाजपचा अनुभव आहे. यंदा मात्र शिवसेनेसोबत दोन हात करता यावेत यासाठी भाजपने ओमी कलानी यांच्यासोबत आघाडी केली आहे. त्यामुळे सेनेने पुन्हा मराठी मतदारांना साद घालण्यास सुरुवात केली आहे.

सिंधी उमेदवार आडोशाला

सिंधी मतांमध्ये फाटाफूट होऊ नये यासाठी एके काळचे कट्टर विरोधक असलेले आयलानी आणि कलानी कुटुंब एकत्र आले आहेत. गेल्या काही वर्षांत उल्हासनगरच्या महापौरपदी मराठी नगरसेवकाची वर्णी लागत असल्याने यंदा सिंधी महापौराचा मुद्दा या भागात अस्मितेचा केला जात आहे. मराठी राजकारण करणाऱ्या शिवसेनेनेही यंदा सिंधी उमेदवारांना संधी देणार असल्याचे जाहीर केले होते. मराठी मतांचा फटका बसू नये यासाठी भाजप आणि शिवसेना पक्षाने काळजी घेतल्याचे दिसते आहे. भाजप व शिवसेनेने उमेदवारांची यादी अंतिम करताना ७८ पैकी ३० उमेदवार मराठी दिले आहेत. साई पक्षाने मात्र ६० उमेदवारांपैकी २२ उमेदवार सिंधी दिले आहेत, तर १७ जागांवर मराठी चेहऱ्यांना प्राधान्य दिले आहे. शिवसेनेच्या यादीत १७, तर भाजपने २७ सिंधी चेहऱ्यांना उमेदवारी दिली आहे. उत्तर भारतीयांनाही सर्व पक्षांनी स्थान दिले असून भाजप ८,सेनेने ७ आणि साई पक्षाने १० उमेदवारांना तिकीट दिले आहे.