भाईंदरच्या हॉटेलमध्ये भीषण स्फोट, बॉम्ब शोधक पथकाकडे तपास

भाईंदर पश्विम परिसरात मॅक्सेस मॉल समोरील भागात नव्याने सुरु झालेले इटालीयोज हॉटेल आहे. रात्री गॅस गळतीमुळे मोठया प्रमाणात उष्ण वायू दाबाचा पट्टा निर्माण होऊन रात्री 12.30 बाराच्या सुमारास भीषण स्फोट झाला. स्फोटाची तीव्रता इतकी होती की, जवळील इमारतींच्या घरातील काचा फुटून नुकसान झाले. तसेच फेरफटका मारण्यास निघालेल्या नागरिकांना काचा लागल्या. त्यांना उपचारासाठी रुग्णालयात दाखल करण्यात आले. सुदैवाने कोणत्याही प्रकारची जीवितहानी झाली नाही. घटनेची माहिती मिळताच घटनास्थळी अग्निशमनदलाचे अधिकारी पोहोचले आणि त्यांनी परिस्थिती आटोक्यात आणली. हॉटेलमध्ये धूर जाण्यासाठी आवश्यक असलेली चिमणीच नसल्यामुळे स्फोट झाल्याचा आरोप करण्यात येत आहे. प्रचंड रहदारी असलेल्या या भागात मध्यरात्रीच्या सुमारास घटना घडली असल्यामुळे जीवितहानी झाली नसली तरी अशी घटना या परिसरात पुन्हा होण्याची भीती नागरिकांमध्ये निर्माण झाली आहे. तर, शहरातील सर्व हॉटेलची तपासणी करून आवश्यक त्या गोष्टी हॉटेल मालकांकडे आहेत का नाही यांची आयुक्तांनी दखल घेण्याची मागणी माजी विरोधीपक्ष नेते असिफ पटेल यांनी केली आहे.

वारंवार होतायेत प्रकार –
मिरा-भाईंदर शहरात आवश्यक असलेल्या अटीशर्तीची पुर्तता न करताच मोठ्या प्रमाणात अनेक हॉटेल कार्यरत आहेत. तसेच गेल्या दोन वर्षातील ही तिसरी घटना असल्याचे समोर आले आहे. त्याचप्रकारे शहरात अनेक भागात फेरीवाले देखील उघड्यावर अनधिकृतरित्या गॅस वापरत असल्यामुळे कोणत्याही क्षणी जीवितहानी होण्याची शक्यता वर्तवली जात आहे.