वसईत रेल्वे गुन्हेगारीत वाढ

मोबाइल, लॅपटॉप चोर सक्रिय; अपुऱ्या पोलीस बळाचा फटका; गेल्या वर्षभरात २१३ गुन्हय़ांच्या घटना
वसई रेल्वे पोलीस ठाण्याच्या हद्दीतील आठ रेल्वे स्थानकांमध्ये गुन्हेगारीमध्ये वाढ झाली आहे. मोबाइल, लॅपटॉप आणि प्रवाशांजवळ असणाऱ्या बॅगा चोरणारे सक्रिय झाले असून गेल्या वर्षी या स्थानकांवर २१३ गुन्हे घडल्याची नोंद आहे. या स्थानकांमध्ये प्रवाशांची संख्या वाढत आहे, मात्र त्या तुलनेने पोलीस बळ वाढत नसल्याने गुन्हेगारी वाढत असल्याची माहिती पोलिसांनीच दिली.
पश्चिम उपनगरातीेल मीरा रोड ते वैतरणादरम्यानचीे आठ रेल्वे स्थानके वसई रेल्वे पोलीस ठाण्याच्या हद्दीमध्ये येतात. त्यात भाईंदर, वसई, नालासोपारा या सर्वाधिक गर्दीच्या स्थानकांचा समावेश होतो. या रेल्वे स्थानक आणि परिसरात दिवसेंदिवस गुन्ह्यात वाढ होत आहे. २०१५ या वर्षांत या रेल्वे स्थानकाच्या हद्दीत तब्बल २१३ गंभीर गुन्ह्यांची नोंद झालीे. २०१४ या वर्षांच्या तुलनेत या गुन्ह्यांमध्ये वाढ झालीे आहे. त्या वर्षी या पोलीस ठाण्याच्या हद्दीत १८३ गुन्हे घडले होते. वाढत्या गुन्हेगारीला रोखण्यासाठी रेल्वे पोलिसांनी पावले उचलावी, अशी मागणी करण्यात येत आहे.
अपुरे पोलीस बळ
वाढत्या गुन्हेगारीमुळे रेल्वे पोलीस त्रस्त झाली असून अपुरा कर्मचारीवर्ग ही प्रमुख समस्या मानली जात आहे. वसई रेल्वे पोलीस ठाण्याची स्थापना १९९१ साली झाली. त्या वेळी अधिकारी आणि कर्मचारी असे मिळून दीडशे कर्मचारी मंजूर होते. आज पंचवीस वर्षांनंतर गुन्हेगारी वाढली तरी पदे तेवढीच आहेत. महिला पोलीस कर्मचारी नसल्याने वसई रेल्वे पोलिसांना इतर रेल्वे पोलीस ठाण्यांकडून मागवावे लागतात. वसई रेल्वे पोलीस ठाण्याच्या हद्दीत ८ रेल्वे स्थानके असून प्रत्येक स्थानकातील फलाटांवर पोलीस बंदोबस्त ठेवता येत नसल्याचे पोलिसांनी सांगितले.