महापौरांचे आदेश धाब्यावर

ठाणे महापालिकेच्या सर्वसाधारण सभेत सदस्यांच्या प्रश्नांना उत्तरे देण्यासाठी अधिकाऱ्यांनी उपस्थित राहावे, असे आदेश महापौर संजय मोरे यांनी देऊनही बहुतांश अधिकारी दांडीबहाद्दर असल्याचे गुरुवारी पुन्हा एकदा स्पष्ट झाले. महापालिकेतील प्रमुख विभाग अधिकाऱ्यांच्या अनुपस्थितीमुळे जाहीर नाराजी व्यक्त करत अशा दांडीबहाद्दर अधिकाऱ्यांवर कारवाई करण्याचे आदेश महापौरांनी पुन्हा एकदा दिले आहेत.
ठाणे महापालिकेच्या सर्वसाधारण सभा तसेच स्थायी समितीच्या सभांना अनेक अधिकारी गैरहजर राहत असल्याचा अनुभव आहे. त्यामुळे नगरसेवक कमालीचे नाराज असून महत्त्वाच्या प्रश्नांना उत्तरे मिळत नसल्याने लोकप्रतिनिधी आणि प्रशासनात वरचेवर खटके उडू लागले आहेत. प्रभागातील एखाद्या विकासकामाच्या किंवा कामातील काही त्रुटीसंबंधी माहिती विचारण्याकरिता लोकप्रतिनिधींकडून सभांमध्ये प्रश्न उपस्थित करण्यात येतात.
मात्र, या सभांमध्ये संबंधित विभागाचे अधिकारी उपस्थित नसल्यामुळे लोकप्रतिनिधींना उत्तरे मिळत नाही. अधिकारी उपस्थित नसल्यामुळे प्रशासनाचा निषेध व्यक्त करत लोकप्रतिनिधींनी सर्वसाधारण तसेच स्थायी समितीच्या अनेक सभा यापूर्वी तहकूब केल्या आहेत. या मुद्दय़ावरून अनेकदा लोकप्रतिनिधींनी महापालिका प्रशासनाला धारेवर धरले आहे. यामुळे काही महिन्यांपूर्वी सर्वसाधारण सभा तसेच स्थायी समितीच्या सभांना उपस्थित राहण्याचे आदेश महापौरांनी दिले होते.