अच्छे दिन येत आहेत!

अपेक्षांचे ओझे घेऊन पंतप्रधान नरेंद्र मोंदीचे सरकार सत्तेवर आले. आधीच्या सरकारबाबत जनमानसात नकारात्मक भावना होती. ती दूर होऊन अच्छे दिन येत आहेत, असे सूचक वक्तव्य भारतीय जनता पक्षाचे राष्ट्रीय उपाध्यक्ष आणि रामभाऊ म्हाळगी प्रबोधनीचे महासंचालक डॉ. विनय सहस्रबुद्धे यांनी शनिवारी ठाण्यात केले.
ठाणे येथील आर्य क्रीडा मंडळ सभागृहामध्ये अथर्व अ‍ॅकफिन संस्थेच्या वतीने ‘अच्छे दिन दृश्य-अदृश्य’ या विषयावर सहस्रबुद्धे यांचे व्याख्यान झाले. या वेळी अथर्व अ‍ॅकफिनचे सर्वेसर्वा अनिरुद्ध केळकर, कोसिआचे महासचिव पुरुषोत्तम अगवण आणि माध्यम सल्लागार मकरंद मुळ्ये आदी उपस्थित होते. भाजप सरकारच्या दहा महिन्यांचा कार्यकाळ, विविध खात्यांच्या मंत्र्यांचे कामकाज आणि नुकत्याच सादर झालेल्या केंद्रीय अर्थसंकल्पाविषयी सहस्रबुद्धे यांनी मत मांडले. कोसिआचे सचिव असणाऱ्या पुरुषोत्तम अगवण यांनी जनतेच्या मनातील सरकारबाबतचे तसेच अर्थसंकल्पविषयक प्रश्न सहस्रबुद्धे यांच्यासमोर मांडले आणि त्या प्रश्नांवर सहस्रबुद्धे यांनी सरकारची भूमिका मांडली. युवा पिढी अधीर आहे, त्यांना कोणताही प्रश्न तात्काळ मार्गी लागावा असे वाटत असते. मात्र धोरणे बदलतात, त्याचे दृश्य स्वरूपात बदल होण्यास वेळ लागतो हे तरुणांनी समजून घेतले पाहिजे, असे मत त्यांनी मांडले. भारत सरकारचे परराष्ट्रविषयक यश उल्लेखनीय आहे. अधिकाधिक संरक्षणविषयक साधनसामग्री भारतात तयार करण्यावर संरक्षण खात्याचा भर आहे, असेही त्यांनी सांगितले. देशाच्या विकास कामांमध्ये पर्यावरणीय मंजुरी अडथळा बनू नयेत, त्यामुळे विकासकामे रखडतात. नुकत्याच सादर करण्यात आलेल्या रेल्वे अर्थसंकल्प हा प्रवाशांना केंद्रस्थानी ठेवून तयार करण्यात आला होता, असे प्रतिपादन सहस्रबुद्धे यांनी केले.
शिक्षणाच्या बाबतीत केंद्रात तसेच राज्यात नवीन शिक्षण धोरण येत आहे. विद्यार्थिवर्गाला त्याचा निश्चित फायदा होणार आहे, असेही त्यांनी सांगितले. अपघातांचे उगमस्थान म्हणजे ‘ड्रायव्हिंग स्कूल’ होय. त्याला आळा घालण्यासाठी नवीन मोटार व्हेइकल कायदा (अ‍ॅक्ट) आकार घेत आहे. त्याचे परिणाम भविष्यात नक्कीच दिसून येतील. असा आशावाद सहस्रबुद्धे यांनी व्यक्त केला. जनधन योजनेअंतर्गत १२ कोटी लोक त्यांची खाती उघडतात हे मोदी सरकारचे यश आहे. तसेच २१ जून हा जागतिक योग दिन घोषित केला जातो. ही निश्चितच भारतीयांसाठी अभिमानाची गोष्ट असल्याचे मत त्यांनी व्यक्त केले.