आधुनिक सावित्रींची ‘वड लागवड’

वटवृक्ष लावून वटपौर्णिमा साजरी
आधुनिकता ही केवळ पेहरावातूनच नाही तर विचारातही असली पाहिजे. स्त्री ही केवळ आधुनिक नाही तर ती वैचारिकही आहे. याचा प्रत्यय रविवारी वटपौर्णिमेच्या निमित्ताने ठाणे, कल्याणातील अनेक भागांमध्ये आला. या शहरांमधील अनेक भागांमधील सावित्रींनी वडाच्या रोपांचे रोपण करून पौर्णिमा साजरी केली.
धावपळीच्या युगात सण साजरे करण्यासाठी लागणाऱ्या सर्वच गोष्टी उपलब्ध होतात असे नाही. त्यामुळे जो तो आपल्या सोयीनुसार, उपलब्धतेनुसार सण साजरे करू लागला आहे.दरम्यान, वटपौर्णिमेला फांद्यांची छाटणी करण्याऐवजी पर्यावरण संवर्धनाचा संदेश देण्याचा प्रयत्न ठाणे, कल्याणातील काही महिलांनी केला. डोंबिवली परिसरातील मिलापनगर येथील महिलांनी दहा वडाची रोपे लावून आगळ्यावेगळ्या पद्धतीने वटपौर्णिमा साजरी केली.
वडाचे झाड हे पर्यावरणाच्या दृष्टीने अत्यंत महत्त्वाचे आहे. मात्र वाढत्या शहरीकरणामुळे या भव्य वटवृक्षाचा नाहक बळी जातो. डोंबिवली येथील काही परिसर कारख्यान्यांमुळे मोठय़ा प्रमाणात प्रदूषित झाला आहे. येथे मोठय़ा प्रमाणावर औद्योगिकीकरण झाल्यामुळे येथील रहिवासी प्रदूषणाशी झुंज देत आहेत. प्रदूषणावर मात करण्यासाठी येथील महिलांनी वटपौर्णिमेच्या निमित्ताने वडाची दहा रोपे लावली आहेत. या वर्षी वटपौर्णिमेला तोडलेल्या फांद्याची पूजा न करण्याचा निर्णय येथील महिलांनी घेऊन इतरांसमोर एक वेगळा आदर्श निर्माण केला आहे. तसेच दर वर्षी अशाच प्रकारे वडाची झाडे लावून वटपौर्णिमा साजरी करणार असल्याचे त्यांनी ठरविले आहे. ठाणे शहरातील काही वस्त्यांमधील महिलांनीही वृक्ष लागवड करून सामाजिक भान राखताना पर्यावरणाला अधिक महत्त्व देत वटपौर्णिमा साजरी करण्याचा नवा पायंडा पाडला आहे.