भगवान मंडलिक कल्याण- येथील मोहने गावात एका मित्राने आपल्या दुसऱ्या मित्रावर बंदुकीतून गोळी झाडून त्याला गंभीर जखमी केले आहे. बंदुकीची गोळी जीभ फाडून घशात अडकली असल्याची माहिती उल्हासनगर मध्यवर्ती रुग्णालयाच्या डाॅक्टरांनी तपासणीनंतर रुग्णाच्या नातेवाईकांना दिली आहे. यानंतर जखमीला उपचारासाठी कळवा येथील छत्रपती शिवाजी रुग्णालयात दाखल करण्यात आले आहे. मोहने गावात सुशील महंतो आणि त्याचे पाच मित्र बुधवारी सायंकाळी एकत्र गप्पा मारत बसले होते. एका मित्राजवळ बंदूक होती. गप्पा सुरू असताना एका मित्राने जवळील बंदुकीतून एक गोळी सुशीलच्या दिशेने झाडली. तो गम्मत करत आहे, असे सुशीलला वाटले. त्याने चेहऱ्यावर हात ठेवला. मित्राने सुशीलच्या तोंडाच्या दिशेने गोळी झाडल्याने गोळी हाताचा पंजामधून आरपार जाऊन जीभ फाडून घशात अडकली. इतर मित्रांनी सुशीलला तात्काळ उल्हासनगरच्या मध्यवर्ती रुग्णालयात दाखल केले. तेथे प्राथमिक उपचार करुन सुशीलला कळवा येथील छत्रपती शिवाजी रुग्णालयात पाठविण्यात आले. तेथे त्याच्यावर अतिदक्षता विभागात उपचार सुरू आहेत. सुशीलवर मित्राने गोळीबार का केला. त्याने बंदूक कोठुन आणली आणि गोळी झाडण्याचे कारण काय, याचा तपास खडकपाडा पोलिसांनी सुरू केला आहे.
