विम्बल्डन महिला एकेरी अंतिम सामन्यात टेनिसची सम्राज्ञी सेरेना विल्यम्स पराभूत झाली. मुलगी जन्माला आल्यानंतर सेरेनाच्या दमदार कमबॅकचं सगळीकडूनच कौतुक झालं. मात्र यावेळी टेनिसची सम्राज्ञी जर्मनीच्या अँजेलिक कर्बरकडून पराभूत झाली. अर्थात तिच्या पराभवामुळे चाहते नाराज झाले. सेरेनाकडून तिच्या चाहत्यांना खूपच अपेक्षा होत्या. मात्र हा सामना पराभूत झालेल्या सेरेनासाठी तिच्या पतीनं एक सुंदर संदेश लिहिला आहे. सेरेनाचा पती अलेक्सिस यानं ट्विटरवर सेरेनाचा फोटो शेअर केला. 'आताशी कुठे सुरूवात केलीये, आमची मुलगी जन्मला आल्यानंतर बरोबर दुसऱ्या दिवशी मी माझ्या पत्नीचं शेवटचं चुंबन घेतलं कारण मला आणि खुद्द तिलाही माहिती नव्हतं की ती जिवंत परत येईल. तिला शस्त्रक्रियेसाठी नेण्यात आलं. तिच्या जगण्याची खात्री नव्हती. मी तिचा शेवटचा निरोप घेतला. ती फक्त जगावी एवढीच प्रार्थना आम्ही करत होतो. पण आज दहा महिन्यांनी ती खेळली आणि विम्बल्डनच्या अंतिम फेरीत पोहोचली' असं म्हणत अलेक्सिसनं तिच्या जिद्दीचं कौतुक केलं आहे. 'सेरेनानं आता कुठे नवीन सुरूवात केली आहे. ती हरली तरी मला खात्री आहे पुढच्यावेळी ती नक्की जिंकेन आणि मुलीसाठी तर ती खात्रीपुर्वक जिंकेन.' असा विश्वासही त्यानं चाहत्यांना दिला आहे. पण याबरोबर सेरेनाला पराभूत करून उत्तम खेळी केलेल्या अँजेलिक कर्बरचंही त्यानं कौतुक केलं आहे.
