मोबाईल फोन वापरणाऱ्या ग्राहकांना आतापर्यंत आपला नंबर दुसऱ्या कंपनीच्या सेवेसाठी पोर्ट करण्यासाठी १९ रूपयांचे शुल्क मोजावे लागत होते. पण, हे शुल्क लवकरच घटवण्यात येणार आहे. दूरसंचार नियामक प्राधिकरणने (ट्राय) यासाठीचा प्रस्ताव मांडला आहे. नेटवर्क वर्तुळातील दुसऱ्या कंपनीची सेवा घेण्याची मुभा देणारी नंबर पोर्टेबिलिटी ही सुविधा १ जानेवारी २०११ पासून सुरू करण्यात आली. नोव्हेंबर २००९ मध्ये दूरसंचार नियामक प्राधिकरणाने या सेवेसाठी १९ रुपये शुल्क निश्चित केले होते. पण, लवकरच हे शुल्क घटून ४ रुपये होणार आहे. मोबाईल नंबर पोर्टेबिलिटीच्या सुविधेमुळे ग्राहकांची गैरसोय मोठ्याप्रमाणावर कमी झाली. सुरूवातीच्या काळात या सुविधेसाठी १९ रूपये आकारले जाणे योग्य होते. मात्र, आताच्या काळात हे शुल्क जास्त आहे, असा अभिप्राय नोंदवत ट्रायने नंबर पोर्टेबिलिटीच्या सुविधा शुल्कात ८० टक्क्यांनी घट करण्याचा प्रस्ताव ठेवला आहे. त्यामुळे लवकरच ग्राहकांना नंबर पोर्टेबिलिटीसाठी फक्त ४ रुपये मोजावे लागणार आहेत.
