VIRAL : अरेच्चा! महिलेच्या वेशातील कैद्याचं असं फुटलं बिंग

होंडूरसच्या तुरूंगात एक मजेशीर प्रकार घडला. फ्रान्सिस्को या ५५ वर्षींय कैद्याला खुनाच्या आरोपावरून तुरूंगवासाची शिक्षा झाली होती. पण त्याला काही तुरूंगात राहवेना. तेव्हा पळून जाण्याचं त्यांनं ठरवलं.  त्याला भारीच कल्पना सुचली त्याने बाईचा वेश धारण केला, तोकडा वनपीस घातला, डोळ्यावर गॉगल, मोठ्या केसांचा विग, बोटांना नेलपेंट लावून हा निघाला. आश्चर्य म्हणजे तुरूंगात ठिकठिकणी सुरक्षा रक्षकही होते पण त्यातल्या एकालाही शंका आली नाही. आता शंका आली नाही की आणखी काही हे मात्र गुलदस्त्यातच आहे. तुरूंगातल्या आतल्या भागातून पळून जाण्यात तो यशस्वी झाला पण मुख्य गेटवर पोहोचताच त्याची चोरी पकडली गेली. कारण त्याने बाईसारखं दिसावं यासाठी ज्या हाय हिल्स घातल्या होत्या त्याने त्याला काही चालता येईना. त्याच्या विचित्र चालण्याच्या पद्धतीवरून इथल्या सुरक्षारक्षकांना शंका आली आणि पुढच्या मिनिटाला त्याचे बिंग फुटले. आता कहर म्हणजे पोलिसांनी चौकशी करायला सुरूवात केल्यावर आपण महिलेसारखं नाजूक आवाजात बोलावं हेही त्याच्या लक्षात आले नाही. तेव्हा तो बाई नसून पुरूष आहे हे ओळखायला सुरक्षारक्षकांना काही वेळ लागला नाही. आता पळून जायची तयारी केली तर एवढ्या साध्या गोष्टी तरी करायला हव्यात हेही या त्याच्या लक्षात आले नाही. तेव्हा त्याचा हा अवतार बघून अनेकांना आपले हसू अनावर झाले.