आजच्या दिवशी ‘टायटॅनिक’निघाले होते शेवटच्या प्रवासाला

ब्रिटनच्या साऊथ हॅप्टन येथून १० एप्रिल १९१२ मध्ये न्यूयॉर्कला जाण्यासाठी टायटॅनिक जहाज निघाले होते. इंग्लडमधला उच्चभ्रु वर्ग तसेच तिस-या वर्गातले गरिब जनता असा हजारो लोकांना घेऊन न्यूयॉर्कला हे जहाज निघाले होते. त्याकाळी जगातले सगळ्यात मोठं आणि कधीही न बुडणारे आलिशान जहाज अशी त्याची ख्याती होती. त्यामुळे साहजिकच या जहाजाला खूपच प्रसिद्धी लाभली होती. पण दुर्दैव म्हणजे ज्या जहाजाची कधीही न बुडणारे जहाज अशी प्रसिद्धी केली गेली त्या जहाजाला आपल्या पहिल्याच प्रवासात जलसमाधी मिळाली. ते कधीच न्यूयॉर्कला पोहोचले नाही. १४ एप्रिलला रात्री ११ वाजून ४० मिनिटांनी उत्तर अटलांटिक महासागराच्या विशाल हिमनगावर हे जहाज आदळले. १५ एप्रिलला अवघ्या २ तास ४० मिनिटांत हजारो प्रवाशांना पोटात घेऊन या जहाजाने जलसमाधी घेतली होती.

काही दिवसांपूर्वी टायटॅनिक पुन्हा एकदा चर्चेत आली होती. आतापर्यंत हिमनगावर आदळून या जहाजाला जलसमाधी मिळाल्याची चर्चा होती पण हा दावा एका आयरिश पत्रकार सेनेन मोलॉनी यांची खोडून काढला. या पत्रकाराने टायटॅनिक हे आगीमुळे बुडाले असल्याचे आपल्या संशोधनात म्हटले होते. बॉयलर भागात सतत आग भडकत होती त्यावेळी जहाजातील बॉयलरचे तापमान हे १ हजार डिग्रीच्या वर पोहचले होते. या आगीमुळे टायटॅनिकचे भाग अत्यंत कमकूवत झाले होते त्यामुळे विशाल हिमनगावर आदळताच ते तुटले असा दावा त्यांनी केला आहे. मोलॉनी यांनी तीस वर्षे यावर अधिक संशोधन केले मोलॉनी यांच्या दाव्याने टायटॅनिक चर्चेत आली होती.