अमेरिकेचे माजी राष्ट्राध्यक्ष बराक ओबामा यांना भारतात शिजवली जाणारी डाळ अर्थातच वरण ठाऊक आहे. याबाबतचा एक किस्सा खुद्द ओबामांनीच सांगितला. सध्या ओबामा भारत दौऱ्यावर आहेत. ‘हिंदुस्तान टाइम्स लीडरशिप समीट’ या कार्यक्रमात ते सहभागी झाले आहेत. या कार्यक्रमाच्या आदल्या रात्री जेव्हा ते जेवायला गेले तेव्हा काय झाले याचा किस्सा त्यांनीच सांगितला.
ओबामांनी नेमके काय सांगितले?
रात्री जेवणात एका वेटरनं काही खाद्यपदार्थ माझ्या ताटात वाढले. त्यात डाळ आणि इतर पदार्थही होते. पदार्थ ताटात वाढल्यानंतर डाळ म्हणजे नेमकं काय ? हा पदार्थ कसा करतात? याबद्दल त्याने मला सांगायला सुरूवात केली. कदाचित एका अमेरिकन माणसाला डाळ म्हणजे काय हे माहिती नसावं असा बिचाऱ्याचा समज झाला असावा. पण, मला डाळ या पदार्थाबद्दल फक्त माहितीच नसून ती कशी तयार करतात हेही मला माहिती आहे. मी स्वत: डाळ बनवतो आणि ती कशी करतात याची सिक्रेट रेसिपीदेखील माझ्याकडे आहे’ असंही ओबामा म्हणले. त्यांनी हे सांगितल्यावर अनेकांना आश्चर्याचा धक्काच बसला.
डाळ या पदार्थाबद्दल माहिती असणारे ते अमेरिकेचे बहुदा पहिलेच राष्ट्रध्यक्ष असतील. ‘डाळीची पाककृती मी माझ्या भारतीय मित्राकडून विद्यार्थीदशेत असताना शिकली होती, तेव्हा तो आणि मी एकाच रूममध्ये राहायचो असेही ओबामा यांनी स्पष्ट केले.
