प्रभाग रचना प्रारूप आराखडा शासनाकडे सादर; महापालिकेत पुन्हा ११५ नगरसेवक

राज्यातील स्थानिक स्वराज्य संस्थांच्या निवडणुका घेण्याचे आदेश सर्वोच्च न्यायालयाने दिले आहेत. त्यानुसार प्रभाग रचना प्रारूप आराखडा तयार करण्याचे निर्देश निवडणूक आयोग आणि शासनाकडून संबंधित यंत्रणांना देण्यात आले आहेत. महाराष्ट्र शासनाच्या नगरविकास विभागाने प्रभागांची रचना कशा प्रकारे करण्यात यावी यासंदर्भात परिपत्रक काढले होते. वसई विरार महापालिका क वर्गामध्ये मोडत असल्याने येथील प्रभागांची रचना महापालिका आयुक्तांकडून केल्या जात आहे. दरम्यान, निवडणूक आयोगाच्या पत्रानुसार वसई विरार शहर महानगरपालिकेने आरक्षित प्रभागांची जाहीर सोडत यापूर्वी २१ मे २०२२ रोजी काढली होती. व प्रभागनिहाय आरक्षण प्रसिद्ध करून त्यावर १ जून ते ६ जून २०२२ या कालावधीमध्ये हरकती व सूचना मागविण्यात आल्या. त्यानंतर १३ मे २०२२ रोजी पुढील सार्वत्रिक निवडणुकीच्या प्रयोजनार्थ आरक्षणाची अधिसूचना महापालिकेने प्रसिद्ध केली. त्यावेळी सदस्य संख्या ११ ने वाढवून १२६ करण्यात आली होती. मात्र तेव्हा निवडणुका झाल्या नव्हत्या.

आता नव्या निर्देशानुसार ४ सदस्यांची प्रभाग रचना केली आहे. यासाठी २०११ च्या लोकसंख्येचे निकष ठरविण्यात आले आहेत. त्यानुसार एका प्रभागात ३५ हजार ते ४० हजार लोकसंख्या असेल. २८ प्रभाग हे ४ सदस्यांचे तर एक प्रभाग हा तीन सदस्यांचा असणार आहे. २९ प्रभागात ११५ नगरसेवकांसाठी वसई विरार महापालिकेची निवडणूक होणार आहे. महापालिकेकडून पाठविण्यात आलेल्या प्रभागरचना प्रारूप आराखड्याला २१ ऑगस्टपर्यंत निवडणूक आयोगाकडून मान्यता घ्यावी लागणार आहे.

राजकीय पक्षांची मोर्चेबांधणी

वसई-विरार महानगरपालिकेची मुदत २०२० च्या जुलै महिन्यात संपुष्टात आली होती. मात्र त्यानंतर करोनामुळे निवडणूका लांबणीवर पडल्या होत्या. तब्बल ५ वर्षानंतर निवडणुका होणार असल्याने राजकीय पक्षांच्या कार्यकर्त्यांमध्ये उत्साह संचारला आहे. शहरातील सर्वच राजकीय पक्षांची मोर्चे बांधणी सुरू झाली आहे. तर इच्छुक असलेल्या उमेदवारांनी सुद्धा विविध कार्यक्रमातून जनसंपर्क वाढविण्यास सुरवात केल्याचे चित्र दिसून येत आहे.