मुंबई महानगरपालिकेच्या महत्त्वाकांक्षी प्रकल्पांपैकी एक सागरी किनारा मार्गाच्या (कोस्टल रोड) वरळी ते मरिन ड्राईव्ह या दक्षिणवाहिनी मार्गिकेचं (अंशतः) उद्घाटन आज मुख्यमंत्र्यांच्या हस्ते होत आहे. यावेळी उपमुख्यमंत्री देवेंद्र फडणवीस, उपमुख्यमंत्री अजित पवार देखील उपस्थित आहेत. उद्घाटनानंतर एक मार्गिका वाहनचालकांसाठी खुली होईल. दरम्यान, सागरी मार्गाचं उद्घाटन पंतप्रधान मोदी यांच्या हस्ते होईल, असं मुख्यमंत्र्यांनी यापूर्वी सांगितलं होतं. मात्र, निवडणुकीची आचारसंहिता येत्या तीन-चार दिवसांत कधीही लागू होण्याची शक्यता असल्याने व पंतप्रधानांची वेळ मिळाली नसल्यामुळेच मुख्यमंत्री आणि उपमुख्यमंत्र्यांच्या उपस्थितीत उद्घाटन सोहळा उरकरण्यात येत असल्याची चर्चा आहे.