20 September 2020

News Flash

महाराजबागेतील पक्षी सापांकडून फस्त

महाराजबाग प्राणिसंग्रहालयातील पक्ष्यांचे पिंजरे रिकामे दिसू लागल्याने एकंदर व्यवस्थापनावरच संशयाची सुई वळली आहे. केंद्रीय प्राणिसंग्रहालय प्राधिकरणाचे नियम अटी व शर्तीनुसार महाराजबागेतील प्राणी आणि पक्ष्यांच्या पिंजऱ्यांची

| December 25, 2012 02:15 am

महाराजबाग प्राणिसंग्रहालयातील पक्ष्यांचे पिंजरे रिकामे दिसू लागल्याने एकंदर व्यवस्थापनावरच संशयाची सुई वळली आहे. केंद्रीय प्राणिसंग्रहालय प्राधिकरणाचे नियम अटी व शर्तीनुसार महाराजबागेतील प्राणी आणि पक्ष्यांच्या पिंजऱ्यांची रचना करण्याची निर्वाणीची सूचना प्राधिकरणाच्या एका जबाबदार सदस्याने काही दिवसांपूर्वीच महाराजबाग व्यवस्थापनाला केल्यानंतरही पिंजऱ्यातील बहुतांश पक्ष्यांना सापांनी फस्त केल्याने नेहमी ऐकू येणाऱ्या निरागस किलबिलाट आता थंडावला आहे.
पक्ष्यांचे पिंजरे रहस्यमयरीत्या रिकामे होऊ लागल्याचे महाराजबागेत येणाऱ्यांच्या नजरेला पडल्यानंतर याचे गांभीर्य लक्षात आले. हा प्रकार व्यवस्थापनाच्या नजरेस आणून दिल्यानंतरही उपाययोजनांना विलंब होत असून तोवर बाकीचे पिंजरेही रिकामे होतील का, अशी शंका उत्पन्न झाली आहे. केंद्रीय प्रधिकरणाच्या इशाऱ्यानंतरही प्रशासन बदललेले नाही.
 महाराजबाग प्राणिसंग्रहालय तत्वत: मान्यतेवर कसेबसे सुरू आहे. ही मान्यता कायमची रद्द करण्याचा इशाराही देण्यात आला आहे. प्राणिसंग्रहालयातील पिंजरे वर्षांनुवर्षे गंजलेल्या स्थितीत आहेत. त्याची डागडुजी करण्याइतपत पंकृविच्या व्यवस्थापानाने हात सैल सोडलेले नाही.  पिंजऱ्यातील जमीन घुशींनी पोखरून टाकल्याने घुशींच्या मागावर असलेले साप पोखरलेल्या जमिनीतून पिंजऱ्यात शिरून पिंजऱ्यातील पक्षी सहजपणे गिळंकृत करत असल्याची चर्चा आहे. ही वस्तुस्थिती व्यवस्थापन मान्य करण्यास तयार नाही.
महाराजबाग प्राणिसंग्रहालयात दुर्मिळ प्रजाती आणि विदेशी पक्ष्यांसाठी आठ पिंजरे उभारण्यात आले असून त्यात बदक, कबुतरे आणि चीन कोंबडय़ा होत्या, तर एका पिंजऱ्यात ससेही होते. सिल्वर, ग्रे कॉकिटेल, बजेरिगर यासारखे पक्षी येथील आकर्षण होते. मात्र, सापांनी ते फस्त केल्यामुळे पिंजरे रिकामे झाले आहे. आता फक्त याठिकाणी पोपट शिल्लक आहेत. प्राणिसंग्रहालयाला दिलेल्या भेटीत पिंजऱ्यात माती अंथरण्याचे काम सुरू होते. भोवतालची जमीन उंदीर व घुशींनी भुसभुशीत केल्याचे स्पष्ट दिसत आहे. यासंदर्भात महाराजबागेचे प्रभारी डॉ. सुनील बावस्कर यांनी पिंजऱ्यांमध्ये नैसर्गिक वातावरणाची निर्मिती करण्यासाठी डागडुजी सुरू असल्याचे स्पष्ट केले. पिंजऱ्यातील पक्ष्यांपर्यत साप रात्रीच्यावेळी झडप घालत असतील. पोखरलेल्या जमिनीतून रात्री साप प्रवेश करू शकतात, ही वस्तुस्थिती बावस्कर यांनी मान्य केली. मात्र सुरक्षिततेसाठी पुरेपूर काळजी घेतली जात असल्याचा दावा त्यांनी केला.  
महाराजबाग व्यवस्थापनाने वेळीच काळजी घेतली असती तर पक्ष्यांचा जीव वाचला असता. नव्याने निविदा काढून पक्षी विकत घेण्याची वेळ महाराजबाग प्रशासनावर आली आहे. प्राणिसंग्रहालयात असा प्रकार घडल्यामुळे त्याची चौकशी व्हावी व दोषींवर कारवाई करण्यात यावी, अशी मागणी महाराजबाग प्रभात मित्रमंडळाचे उमेश चौबे यांनी केली आहे.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on December 25, 2012 2:15 am

Web Title: snakes finished the birds in maharaj garden
टॅग Birds
Next Stories
1 रामन विज्ञान केंद्रात गुरुवारपासून विविध स्पर्धा
2 शिवाजी विज्ञान महाविद्यालयात आंतरराष्ट्रीय गणितीय विज्ञान परिषद
3 अधिकाधिक प्रश्न अधिवेशनाच्या माध्यमानेच सोडविले जातात – केसरी
Just Now!
X