मतदानाला जाताय, हे लक्षात ठेवा!

मतदारांची ओळख पटविण्यासाठी आवश्यक असलेल्या ओळखपत्रांच्या यादीतून केंद्रीय निवडणूक आयोगाने शिधापत्रिका वगळली आहे. मतदार छायाचित्र ओळखपत्र उपलब्ध नसले तरी आता मतदानासाठी ११ प्रकारची छायाचित्रांकित ओळखपत्रे ग्राह्य धरली जाणार आहेत. त्यापैकी कोणतेही एक छायाचित्र ओळखपत्र सादर करून मतदान करता येईल. त्याचबरोबर मतदानाला जाण्याआधी मतदारांनी निवडणूक आयोगाच्या संकेतस्थळावर जाऊन आपले नाव यादीत असल्याची खातरजमा करावी, असे आवाहनही करण्यात आले आहे. मुंबई, ठाण्यातील लोकसभा मतदारसंघांसाठी गुरुवार, २४ एप्रिल रोजी मतदान होत आहे. आयत्यावेळी मतदार यादीतील नावाचा घोळ टाळण्यासाठी मतदारांनी www.ceo.maharashtra.gov.in या संकेतस्थळावर जाऊन मतदार यादीत आपले नाव असल्याची खातरजमा करून घ्यावी.