जोंधळे विद्यासमूहाचे संचालक सागर जोंधळे यांच्यासह सहा जणांवर कल्याण जिल्हा सत्र न्यायालयाच्या आदेशावरून विष्णुनगर पोलीस ठाण्यात बुधवारी गुन्हा दाखल करण्यात आला. या प्रकरणामध्ये सुमन सातपुते, सागर जोंधळे, देवेंद्र जोंधळे, वैशाली जोंधळे, नरेंद्र चौधरी, लक्ष्मण पठारे यांना आरोपी करण्यात आले आहे. समर्थ समाज संस्थेचे अध्यक्ष शिवाजीराव जोंधळे यांच्या तक्रारीवरून हा गुन्हा दाखल करण्यात आला. समर्थ समाज संस्थेवर ताबा मिळविण्यासाठी, महाविद्यालयाचा कारभार ताब्यात देण्यासाठी कट कारस्थान रचणे, आर्थिक मोबदल्याची मागणी करणे, दुष्ट हेतूने खोटय़ा तक्रारी करणे असे प्रकार आरोपींकडून करण्यात येत असल्याचे शिवाजीराव यांनी विष्णुनगर पोलीस ठाण्यातील तक्रारीत म्हटले आहे.
