शारदीय नवरात्रोत्सवासाठी करवीरनगरी सज्ज

घटस्थापनेच्या पूर्वसंध्येला शारदीय नवरात्रोत्सवाची जय्यत तयारी झाल्याचे चित्र करवीर नगरीत पहायला मिळत होते. महालक्ष्मी मंदिरात उद्यापासून नवरात्रोत्सवाला विधिवत सुरूवात होणार आहे. तसेच वाडी रत्नागिरी येथेही या उत्सवानिमित्त विविध धार्मिक उपक्रमांचे आयोजन करण्यात आले आहे. शहरातील नवरात्रोत्सव मंडळांनी उद्या वाजत गाजत देवीची प्रतिष्ठापना करण्याचे नियोजन केले आहे. सीमोल्लंघनापर्यंत करवीर नगरीत नवरात्रोत्सवाचे मंगलमय वातावरण पहायला मिळणार आहे. उत्सवानिमित्त शहरात देशभरातून मोठय़ा संख्येने भाविकांचे आगमन होणार असल्याने महालक्ष्मी मंदिरासह शहरात कडेकोट पोलीस बंदोबस्त तैनात करण्यात आला आहे.    
साडेतीन शक्तीपीठांपैकी एक असलेल्या महालक्ष्मी मंदिरामध्ये शनिवारपासून नवरात्रोत्सवाला सुरूवात होणार आहे. सकाळी साडेसात वाजल्यापासून घटस्थापनेचा पूजाविधी होणार आहे. मुख्य विधी साडेआठ ते साडेनऊ या कालावधीत होणार आहे.  पुण्याहवाचन, नवारणपूजा, घटस्थापना यांचा यामध्ये समावेश आहे. या वेळी तोफेची सलामी दिली जाणार आहे. सकाळी साडेआठ व साडेअकरा या वेळी पंचामृतभिषेक, तर साडेनऊ व दुपारी साडेबारा वाजता देवीची आरती केली जाणार आहे. दुपारी दोन वाजल्यापासून अलंकार महापूजेला प्रारंभ होणार असून हा विधी सुमारे दीड तास चालणार आहे. रात्री साडेनऊ वाजता पालखी सोहळ्याचे आयोजन केले आहे, अशी माहिती पंकज दांदर्णे यांनी दिली. श्री केदारलिंग (जोतिबा) देवस्थान-वाडी रत्नागिरी येथेही नवरात्रोत्सवाला प्रारंभ होत आहे. उत्सवकाळात घटस्थापना, जागर, पालखी, खंडेनवमी, सीमोल्लंघनाची श्री पालखी व लळीत अशा विविध कार्यक्रमांचे आयोजन केले आहे. येथेही भाविकांचा राबता वाढणार असल्याची शक्यता लक्षात घेऊन जोतिबाचे दर्शन सुलभ होण्याच्यादृष्टीने नियोजन केले आहे.प्रतिवर्षांप्रमाणे केएमटीच्यावतीने नवदुर्गा दर्शन सहलीचे आयोजन केले आहे. साडेसहा तासाच्या या सहलीमध्ये शहर व परिसरातील देवतांचे दर्शन घडविले जाणार आहे. त्यासाठी खास बसेसची सोय करण्यात आली आहे. महिला बचतगट, महिला मंडळ यांना हव्या असणा-या ठिकाणी या यात्रा बसेस सशुल्क उपलब्ध करण्यात येणार आहेत.    
नवरात्रोत्सवाच्या पाश्र्वभूमीवर महालक्ष्मी मंदिरातील सुरक्षा यंत्रणाही सुसज्ज झाली आहे. मुख्य मंदिरातील गणपती चौकात मोबाईल जॅमर बसविण्यात आला असल्याने मंदिरातील मोबाईल बंद लागत आहेत. याशिवाय नगारखान्याच्या जवळ व घाटी दरवाजा या दोन ठिकाणी हे जॅमर बसविले जाणार आहेत. मंदिराच्या आवारात सध्या २८ सीसी टीव्ही कॅमेरे बसविले असून आणखी ४ कॅमेरे वाढविण्यात आले आहेत. तर एक हाय फ्रिक्वेन्सी असलेला कॅमेरा नगारखान्याजवळ बसविण्यात येणार आहे. त्या कॅमे-यामध्ये एकाचवेळी पूर्ण मंदिर परिसर दिसेल, अशी व्यवस्था आहे. तसेच पोलीसांना व देवस्थान समितीच्या सुरक्षारक्षकांना १० हँड मेटल डिटेक्टर देण्यात आले आहेत. पोलिसांच्या व्यतिरिक्त होमगार्ड, व्हाईट आर्मी, विविध खासगी संस्था, आपत्कालीन पथक तैनात करण्यात आले आहे.