जागतिक मराठी अकादमी आणि कर्मवीर भाऊसाहेब हिरे प्रतिष्ठान यांच्या वतीने येथे आयोजित दहाव्या ‘शोध मराठी मनाचा’ संमेलनाचे उद्घाटन शनिवारी सकाळी १० वाजता मनसेचे अध्यक्ष राज ठाकरे यांच्या हस्ते महाकवी कालिदास कलामंदिरात होणार आहे. संमेलनाचे अध्यक्षस्थान प्रसिध्द दिग्दर्शक आशुतोष गोवारीकर हे भूषविणार आहेत.
उद्घाटन सोहळ्यास प्रमुख पाहुणे म्हणून सांस्कृतिक मंत्री संजय देवतळे, दिग्दर्शक जब्बार पटेल, सिडनी महाराष्ट्र मंडळाचे अध्यक्ष शरद पाठक, अमेरिकेतील बृहन्महाराष्ट्र मंडळाचे अध्यक्ष ंआशिष चौघुले तसेच इंडोनेशिया, कॅनडा, जपान व जर्मनीतील महाराष्ट्र मंडळांचे प्रमुख अनुक्रमे कांचन निसुरे, लिना देवधरे, निरंजन गाडगीळ, निरूपमा सोनाळकर आदी उपस्थित राहणार आहेत. दुपारी १२ वाजता गोवारीकर आणि २.३० वाजता राज ठाकरे यांच्या मुलाखतीचा कार्यक्रम होईल. सायंकाळी चार वाजता ‘समुद्रापलिकडे भाग एक’ मध्ये ऑस्ट्रेलियातील शरद पाठक, दुबईतील अशोक कोरगावकर, चीनमधील सुभाष दामले आणि अमेरिकेतील गजानन सबनीस हे मार्गदर्शन करतील. सायंकाळी सहा वाजता डॉ. उदय निरगुडकर यांची ‘यशस्वीतेची परिभाषा’ या विषयावर मुलाखत, रात्री आठ वाजता दिल्लीतील सार्वजनिक उत्सव समितीच्या सहकार्याने सांस्कृतिक कार्यक्रम, अशी पहिल्या दिवसाच्या कार्यक्रमांची रूपरेषा आहे. रविवारी सकाळी १० वाजता ‘मुक्काम पोस्ट नाशिक’ या कार्यक्रमातंर्गत देश व परदेशात कर्तृत्व गाजविणारे रवींद्र सपकाळ, शशिकांत जाधव, कविता राऊत, राजीव पाटील यांच्यासह जपानमधील डॉ. पंकज कोईनकर हे उपस्थितांशी संवाद साधणार आहेत.
दुपारी १२ वाजता ‘समुद्रापलिकडे भाग दोन’ मध्ये अमेरिकेतील अनिल नेरुळकर, जर्मनीतील निरुपमा सोनाळकर (जर्मनी), ऑस्ट्रेलियातील सुजिता राणे मार्गदर्शन करतील. दुपारी अडीच वाजता मिरा उमप यांची मुलाखत, सायंकाळी चार वाजता ‘शतक चित्रपटसृष्टीचे’ या विषयावर विजय कोंडके व जब्बार पटेल यांची चर्चा, असे कार्यक्रम होतील. पाच वाजता साहित्य संस्कृती मंडळाचे अध्यक्ष मधु मंगेश कर्णिक, अमेरिकेतील उच्चायुक्त ज्ञानेश्वर मुळे यांच्यासह विविध मान्यवरांच्या उपस्थितीत समारोप होणार आहे. संमेलनास सर्वानी उपस्थित राहण्याचे आवाहन स्वागताध्यक्ष आ. डॉ. अपूर्व हिरे, कर्मवीर भाऊसाहेब हिरे प्रतिष्ठानचे अध्यक्ष प्रशांत हिरे यांनी केले आहे.