पोलिसाला मारहाणप्रकरणी तिघांना ९ महिन्यांची कैद

पोलिसास मारहाण केल्याच्या आरोपावरुन न्यायालयाने आज योगेश किसन देशमुख, सतीश अशोक चव्हाण व स्वप्नील यशवंत दगडे (तिघेही रा. नगर) या तिघांना ९ महिने कैद व दीड हजार रु. दंडाची शिक्षा सुनावली. मुख्य न्यायदंडाधिकारी एस. के. कदम यांनी या खटल्याचा निकाल दिला. सरकारतर्फे सरकारी वकील रजनी देशपांडे यांनी युक्तीवाद केला. तोफखाना पोलीस ठाण्याचे शिपाई जालिंदर काशिनाथ लोंढे यांनी फिर्याद दिली होती.
३१ डिसेंबर २०१० रोजी मनमाड रस्त्यावरील हॉटेल संजोगमध्ये वर्षांखेरीचा संगीताचा कार्यक्रम होता. तिन्ही आरोपी मध्यरात्रीनंतर दोनच्या सुमारास तेथे गेले व गोंधळ घालू लागले. हॉटेल मालकाने पोलिसांना बोलावले. तेथे आलेल्या तोफखाना ठाण्याचे लोंढे यांना तिघांनी मारहाण केल्याची फिर्याद आहे. योगेश देशमुख हा निवृत्त पोलीस कर्मचाऱ्याचा मुलगा आहे.