भैरवगड किल्ल्यावरील चढाईमार्ग पुन्हा सुरक्षित

ठाणे जिल्ह्य़ातील भैरवगड (मोरोशी) किल्यावरील पारंपरिक चढाई मार्गावर पुन्हा लोखंडी सळ्या लावण्यात आल्याने हा मार्ग सुरक्षित बनला आहे. दुर्गप्रेमी गिरिभ्रमण संस्था व सेफ क्लायम्बिंग इनिशिएटिव्ह संस्थेकडून हे काम सहा दिवसांत पूर्ण करण्यात आले.
ठाणे जिल्ह्यात माळशेज घाट उतरल्यावर मोरोशी गावच्या दक्षिणेस भैरवगड आहे. या गडाची ४५० फूट उंचीची भिंत पूर्व-पश्चिम पसरली आहे. ८० अंशांची उभी चढाई व तुटलेल्या पायऱ्या यांमुळे किल्ल्यावर जाणारी वाट धोकादायक बनली होती. त्यावर चढताना यापूर्वी पारंपरिक रिंग बोल्ट वापरण्यात आले होते. मात्र, कालांतराने ते बोल्ट गंजून गेल्याने हा मार्ग खडतर बनला होता. या जुन्या रिंग बोल्टच्या जागी नवीन बोल्ट बसविण्यात आले आहे. त्यात दोन्ही संस्थांचे एकूण ११५ स्वयंसेवक सहभागी झाले होते.