पॅन कार्ड, सिम कार्डपासून ते सरकारी अनुदानापर्यंत 'आधार'सक्ती केल्यानंतर आता केंद्र सरकारने मृत्यूच्या प्रमाणपत्रासाठीही आधार कार्ड बंधनकारक केले आहे. १ ऑक्टोबर २०१७ पासून हा निर्णय लागू होणार असून मृत्यू झालेल्या व्यक्तीचा आधार कार्ड क्रमांकही मृत्यूचा दाखला काढताना द्यावा लागणार आहे. शुक्रवारी केंद्रीय गृहमंत्रालयाअंतर्गत येणाऱ्या रजिस्ट्रार जनरल इंडियाने पत्रक काढून मृत्यूच्या दाखल्यासाठीच्या नवीन नियमाची माहिती दिली. मृत्यूचा दाखला काढताना मयत व्यक्तीचा आधार कार्ड क्रमांक द्यावा लागणार आहे. यामुळे मयत व्यक्तीच्या आधार कार्डचा गैरवापर होणार नाही, तसेच त्या व्यक्तीविषयीची माहितीही सरकारकडे उपलब्ध असेल असे सूत्रांनी सांगितले. तसेच मयत व्यक्तीची ओळख पटवण्यासाठी विविध कागदपत्रे सादर करण्याची गरज राहणार नाही, असे अधिकाऱ्यांनी सांगितले. मेघालय, आसाम आणि जम्मू काश्मीर वगळता देशातील सर्व राज्य आणि केंद्रशासित प्रदेशांसाठी हा निर्णय लागू असेल. संबंधित यंत्रणांनी या निर्णयाची अंमलबजावणी करावी असे पत्रकात म्हटले आहे. यापुढे मृत्यूच्या दाखल्यासाठी अर्ज करणाऱ्यांना मृत व्यक्तीचा आधार कार्ड क्रमांक किंवा 'आधार'साठी केलेल्या अर्जाचा क्रमांक द्यावा लागणार आहे. मृत व्यक्तीच्या नावे 'आधार कार्ड' नसल्यास अर्जदाराला प्रमाणपत्र द्यावे लागेल. यामध्ये मृत व्यक्तीकडे आधार कार्ड नसल्याची माहिती नमूद करावी लागेल.
