आठ दिवसांपूर्वी विवाह झालेल्या एका २७ वर्षीय युवकाने स्वत:च्याच शेतात विषारी द्रव्य प्राशन करून आत्महत्या केल्याची घटना उघडकीस आली आहे. हा प्रकार केकतपांगरी (ता. गेवराई, जि. बीड) येथे मंगळवारी सकाळी १० च्या सुमारास समोर आला. सिद्धेश्वर बाबुराव शिंदे असे मृत व्यक्तीचे नाव असून आत्महत्येमागचे कारण समजू शकलेले नाही. या प्रकरणी गेवराई पोलीस ठाण्यात अद्याप गुन्हा नोंद झाला नव्हता. सिद्धेश्वरने आज सकाळी १० च्या सुमारास विषारी द्रव्य प्राशन केले. त्याने विष घेतल्याचे लक्षात आल्यानंतर लगेचच त्याला उपचारासाठी गेवराई येथील उपजिल्हा रूग्णालयात नेले. परंतु, तो गंभीर असल्याने त्याला बीड जिल्हा रूग्णालयात दाखल करण्यात आले. उपचारादरम्यान त्याचा मृत्यू झाला. तो शेतीकाम करत असत. विशेष म्हणजे याच महिन्यात दि. १६ मे रोजी त्याचा विवाह झाला होता. कोणत्या कारणामुळे त्याने आत्महत्या केली, हे अद्याप समजू शकलेले नाही.