कारागृहात असतानाही आपल्या कारवायांमुळे कायम चर्चेत राहणाऱ्या शहरातील कुप्रसिद्ध शाबीर नासीर पठाण उर्फ मोठा पठाण आणि समीर नासीर पठाण या भावांनी शनिवारी रात्री साडे दहाच्या सुमारास कारागृह कर्मचा-यांना मारहाण करण्याचा प्रकार घडला आहे. याप्रकरणी नाशिक रोड पोलीस ठाण्यात दोघांविरुद्ध गुन्हा दाखल करण्यात आला आहे. पठाण बंधू टिप्पर गँगचे म्होरके आहेत. शनिवारी रात्री साडे दहाच्या सुमारास हे दोघे तुरुंगात रेडीओ ऐकत होते. त्यावेळी तुकाराम बोरसे या कैद्याने चॅनेल बदलल्याने आलेल्या रागातून या दोघांनी तुकारामला मारहाण करण्यास सुरवात केली. ही मारहाण सुरु असताना बिस्मिल्ला शबीर तडवी हा कारागृह शिपाई व महेंद्र पगार हे कर्मचारी भांडण सोडवण्यासाठी गेले असता या पठाण बंधूनी या दोघांनाही मारहाण केली. या दोघांविरुद्ध नाशिकरोड पोलीस ठाण्यात गुन्हा दाखल करण्यात आला आहे. टिप्पर गँग पूर्वइतिहास टिप्पर गँग ही नाशिकमधील कुप्रसिद्ध गुंडांची गँग आहे. शाबीर नासीर पठाण हा या गँगचा म्होरक्या. समीर पठाण हा त्याचा सख्खा भाऊ असून या दोघांवर लुटमार, प्राणघातक हल्ले, खंडणी आदी गुन्हे दाखल आहेत. दोघे बंधू त्यांच्या गँगमधील इतर सदस्य यांनी गेल्या ८-१० वर्षापासून नाशिकच्या सिडको परिसरात दहशतीचे वातावरण निर्माण केले होते. काही वर्षांपूर्वी सिडकोत झालेल्या मोटारसायकलच्या जाळपोळीमागे या टिप्पर गँगचा हात होता. हे दोघे बंधू सध्या नाशिक मध्यवर्ती कारागृहात शिक्षा भोगत असून कारागृहातही त्यांनी अशा प्रकारची दहशत निर्माण करण्याचा प्रयत्न चालवला असल्याचे या प्रकारावरून दिसून येते.