पिंपरी पालिकेतील माजी नगरसेवक मारुती भापकर यांनी शनिवारी शिवसेनेत प्रवेश केला. पूर्वाश्रमीचे शिवसेनेचे, मात्र नंतरच्या काळात अपक्ष, आम आदमी पार्टी, स्वराज अभियान या मार्गाने भापकर पुन्हा शिवसेनेत परतले आहेत. चिंचवड स्टेशन-काळभोरनगर-मोहननगर प्रभागात शिवसेनेकडून ओबीसी गटातील उमेदवारी मिळावी, या हेतूने भापकर शिवसेनेत गेले आहेत.पक्षप्रमुख उद्धव ठाकरे यांच्या उपस्थितीत मुंबई येथे भापकर यांच्यासह माजी विरोधी पक्षनेते दत्ता वाघेरे, माजी नगरसेवक प्रतीक झुंबरे, किरण वाघेरे, नंदू बारणे आदींनी शिवसेनेत प्रवेश केला. संपर्कप्रमुख डॉ. अमोक कोल्हे, खासदार श्रीरंग बारणे, आमदार गौतम चाबुकस्वार, शहरप्रमुख राहुल कलाटे, गटनेत्या सुलभा उबाळे आदी या वेळी उपस्थित होते. ज्या पध्दतीने प्रभागरचना झाल्या आहेत, ते पाहता अनेकांची राजकीय गणिते बिघडली आहेत. मोठे क्षेत्र असल्याने अपक्ष निवडणूक लढवण्याची तयारी उमेदवारांची नाही. त्यामुळे त्या-त्या भागात चांगले वातावरण असलेल्या राजकीय पक्षांची निवड करून पक्षप्रवेश करण्याचा सपाटा शहरात सुरू आहे.
