अक्षर पटेल News

नाडियाडचा जयसूर्या या नावाने अक्षर ओळखला जातो. २०२४ टी२० वर्ल्डकपच्या फायनलमध्ये तीन फलंदाज झटपट तंबूत परतल्यानंतर अक्षरने साकारलेली ३१ चेंडूत ४७ खेळी चाहत्यांच्या आजही स्मरणात आहे. याच स्पर्धेत अक्षरने ऑस्ट्रेलियाच्या मिचेल मार्शचा सीमारेषेवर घेतलेला थरारक झेलही. शांत, संयमी अक्षर यंदाच्या वर्ल्डकप स्पर्धेत भारतीय संघाचा उपकर्णधारही असणार आहे. विकेट टू विकेट शिस्तबद्ध गोलंदाजी, परिस्थितीनुरुप खेळी साकारण्याची क्षमता आणि अफलातून क्षेत्ररक्षक यामुळे अक्षर हे एक पॅकेजच आहे. अक्षरकडे असलेला टी२० प्रकाराचा प्रदीर्घ अनुभव भारतीय संघासाठी कामी येऊ शकतो.प्रतिस्पर्धी फलंदाज जोरदार हाणामारी करत असताना अक्षर गोलंदाजीला येतो आणि हमखास विकेट मिळवून देतो. प्रत्येक सामन्यात तो किमान १० धावा क्षेत्ररक्षणाच्या माध्यमातून वाचवतो. आयपीएल स्पर्धेत अक्षर दिल्ली कॅपिटल्स संघाचं नेतृत्व करतो.टेस्ट आणि वनडे प्रकारातही अक्षरने आपलं नैपुण्य सिद्ध केलं आहे. रवींद्र जडेजा आणि रवीचंद्रन अश्विन यांच्या अनुपस्थितीत अक्षरकडेच फिरकी आक्रमणाची धुरा आहे.